Ինչպես միշտ, ոստիկանությունը իրեն դրսևորում է ոչ նպատակահարմար և իրավաչափ: Վարդգես Գասպարիի ձերբակալությունը անօրինական է, քանի որ, ներկաների փաստմամբ, Գասպարին ոչ մի խուլիգանական արարք չի թույլ տվել: Այսօր «Առաջին լրատվական»-ի հետ զրույցում նման տեսակետ հայտնեց իրավապաշտպան Միքայել Դանիելյանը` մեկնաբանելով երեկ կառավարության շենքի բակում խաղաղ ցուցարար Գասպարիի ձերբակալությունը:
Իրավապաշտպանի կարծիքով`միանգամից երկու հոդվածի համար հիմքեր չկան:
Այն հարցին, թե հնարավո՞ր է՝ ձերբակալման պատճառ են հանդիսացել Գասպարիի վանկարկումները, նա պատասխանեց, որ, ամենայն հավանականությամբ, դրանք են եղել պատճառը: «Գասպարիի վանկարկումները եղել են ոստիկանների ոչ ադեկվատ գործողությունների ադեկվատ պատասխանը: Ինչպես Գասպարիին ձերբակալեցին, այնպես էլ հիմքեր կան ոստիկաններին ձերբակալելու համար»,- նշեց Մ. Դանիելյանը` հավելելով, որ պետք է պատասխանատվության ենթարկել այն ոստիկաններին, որոնք նման միջադեպ են հրահրել:
Հիշեցնենք, որ երեկ առավոտյան «Բանակն իրականում» բողոքի ակցիայի ընթացքում ոստիկանները բռնի գործողություններով ոստիկանություն բերման ենթարկեցին խաղաղ ցուցարար Վարդգես Գասպարիին: Երեկոյան պարզ դարձավ, որ նրան մեղադրանք է առաջադրվել Քրեական օրենսգրքի երկու հոդվածով:
