Վարդգես Գասպարին իրականացրել է իր կարծիքն ազատ արտահայտելու իրավունքը: Այսօր «Առաջին լրատվականի» հետ զրույցում նշեց իրավապաշտպան Արտակ Զեյնալյանը` անդրադառնալով երեկ Կառավարության շենքի առջև տեղի ունեցած միջադեպին, որի արդյունքում ձերբակալվել էր «Բանակն իրականում» ակցիայի մասնակից, խաղաղ ցուցարար Վարդգես Գասպարին:
«Գասպարին ընդամենը իր կարծիքն է ազատ արտահայտել և իրականացրել է խաղաղ հանրահավաքների ազատության իր իրավունքը»,-իրավական տեսանկյունից մեկնաբանեց միջադեպը Ա. Զեյնալյանը` հավելելով, որ նշվածները ձերբակալության հիմք չեն կարող ծառայել: Նրա կարծիքով` իշխանությունը միանգամից երկու հոդվածով քրեական մեղադրանք է առաջադրել քաղաքական խնդիրներ լուծելու համար:
Նշենք, որ երեկ բանակում տեղի ունեցող սպանությունների և անօրինությունների դեմ կազմակերպված ակցիան անակնկալ ընթացք ստացավ, քանի որ ոստիկանություն բերման ենթարկվեց Վարդգես Գասպարին, ում մեղադրանք է առաջադրվել քրեական օրենսգրքի շուրջ երկու հոդվածով:
