Ինչպես «Առաջին լրատվականին» տեղեկացնում են ՀՀ ԱԳՆ-ից, հոկտեմբերի 19-ին Իտալիայում ՀՀ դեսպան Ռուբեն Կարապետյանն այցելել է Լացիո նահանգի Չիվիտավեկկիա (Civitavecchia) քաղաք`Իտալիայի կարևորագույն ծովային նավահանգիստներից մեկը:
Այցի շրջանակում ՀՀ դեսպանն այցելել է քաղաքում գտնվող և նահանգի միակ «ՅՈՒՆԻՍԵՖ-ի դեսպան» տիտղոսը կրող Անտոնիո դե Կուրտիսի անվան միջնակարգ դպրոց: Հատկանշական է, որ ընթացիկ տարում Չիվիտավեկկիայի դպրոցի «քույր դպրոց» էր հայտարարվել Երևանի Մարի Իզմիրլյանի անվան մանկատունը:
Հանդիպմանն աշակերտները պատրաստել էին երաժշտական ծրագիր, որից հետո Եվրախորհրդարանի նախկին պատգամավոր, քաղաքապետ Ալեսանդրո Բատտիլոկիոն ներկայացրել է ընթացիկ ամռանը Երևան այցելության տեսանյութը:
Դեսպանը դպրոցի սաներին է փոխանցել իրենց Երևանի ընկերների ողջույնները և խոստացել բարեկամությունը սերտացնելու նպատակով փախայցելություններ կազմակերպել` հատուկ շեշտելով մանկական հասակում հաստատված ընկերության ամրությունն ու առավելությունը, որը պահպանվում է ողջ կյանքի ընթացքում:
Դեսպանը դպրոցականներին տեղեկացրել է, որ Հայաստանում դպրոցներում որպես ուսումնական ծրագիր ընդգրկվել է շախմատը, որն աշխարհի ամենահին և իմաստուն խաղերից մեկն է, և դա հաշվի առնելով` Ռուբեն Կարապետյանը դպրոցին է նվիրել Հայաստանի քարերից պատրաստված շախմատ:
Այնուհետև դեսպանն այցելել է Լացիո նահանգի Տոլֆա քաղաք, հանդիպել քաղաքապետ Լուիջի Լանդիի հետ:
Հանդիպմանը երկուստեք կարևորվել է ապակենտրոնացված համագործակցության զարգացումը` այն դիտարկելով երկկողմ հարաբերությունների առավել զարգացման և խորացման հիմք:
