Ներիշխանական հակասությունների սրման այս փուլում բավական հետաքրքրական է դառնում հարցը, թե ինչպես կպահի իրեն Հայ ազգային կոնգրեսը, որն իր շուրջօրյա հանրահավաքների ընթացքում բավական թափանցիկ մեսիջ էր հղում «Բարգավաճ Հայաստան» կուսակցությանը: Այդ հարցում երևի թե էական նշանակություն կունենա ներիշխանական ներկայիս հակասություններում Ռոբերտ Քոչարյանի մասնակցության կամ ներգրավվածության գործոնը:
Եթե ՀՀԿ-ԲՀԿ տիրույթում առաջացել է լարվածություն, և դա Ռոբերտ Քոչարյանի, այսպես ասած, ձեռքի գործն է կամ ներգրավվածության արդյունքը, ապա այստեղ Կոնգրեսը, ամենայն հավանականությամբ, կընտրի Սերժ Սարգսյանին անուղղակի աջակցելու տարբերակը, քանի որ Ռոբերտ Քոչարյանի վերադարձը, ըստ ամենայնի, գործընթացները տեղափոխելու է առավելապես դեստրուկտիվ զարգացումների փուլ, ինչը չի կարող Հայ ազգային կոնգրեսի՝ որպես ընդդիմության համար լինել նախընտրելի, եթե Կոնգրեսը զգալիորեն կորցրել է իր հասարակական վարկանիշը և լայն զանգվածներ մոբիլիզացնելու ունակությունը: Թեև, մյուս կողմից էլ պետք չէ բացառել, որ Քոչարյանի վերադարձի դեպքում Կոնգրեսը նույնիսկ իր կամքից անկախ վերգտնի մոբիլիզացիոն կորուսյալ պոտենցիալը: Այդ իմաստով նույնիսկ կարելի է ասել, որ Քոչարյանի գործոնի առանձնահատկություններից մեկը, թերևս, եզակի դրական է հանրային իմաստով ու կարող է լինել հենց բողոքական հանրության մոբիլիզացիան:
Իսկ եթե ներկայիս ՀՀԿ-ԲՀԿ հակադրության մեջ, այդուհանդերձ, չկա Քոչարյանի գործոնը, և իրականում Գագիկ Ծառուկյանը պարզապես փորձում է հետապնդել իր տնտեսա-քաղաքական շահն ու ընտրական փուլից առաջ պայմաններ թելադրել իշխանությանը՝ մտահոգվելով իր հետագա շահով, ապա չի բացառվում, որ Հայ ազգային կոնգրեսը փորձի ինչ-որ ժամանակահատված ոչ ուղղակի և ոչ աներկբա, բայց ինչ-որ չափով աջակցել ԲՀԿ գործողություններին, եթե, իհարկե, «Բարգավաճ Հայաստան»-ում մինչև վերջ որոշեն զբաղվել քաղաքականությամբ և ոչ թե քաղաքական իմիտացիայով: Համենայն դեպս, շուրջօրյա հանրահավաքների ընթացքում ԲՀԿ հասցեին արված բացահայտ մեսիջը հուշում է այդ հարցում գործակցելու Կոնգրեսի պատրաստակամության մասին, և, ըստ էության, պետք չէ բացառել, որ, այսպես ասած, ներքաղաքական երկխոսության երկրորդ փուլում արդեն մենք ականատես լինենք ոչ թե Կոնգրես-ՀՀԿ կամ Կոնգրես-Կոալիցիա, այլ Կոնգրես-ԲՀԿ երկխոսության, թեկուզ՝ ոչ հրապարակային: