Տիգրան Սարգսյանը երեկ սանկտ-Պետերբուրգում ԱՊՀ երկրների վարչապետների խորհրդի նիստի շրջանակում երկկողմ հանդիպում է ունեցել ՌԴ վարչապետ Վլադիմիր Պուտինի հետ: Տիգրան Սարգսյանը Պուտինին շնորհակալություն է հայտնել 2009 թվականին Հայաստանին հակաճգնաժամային 500 միլիոն դոլար վարկ տալու համար: Հետաքրքիր է, թե Հայաստանը դեռ քանի տարի է շարունակելու Ռուսաստանին շնորհակալություն հայտնել այդ վարկի համար:
Այդ իրավիճակը հայտնի «տժվժիկի» պատմությունն է հիշեցնում, և Հայաստանի իշխանությունը թերևս այնքան է շնորհակալություն հայտնելու Պուտինին դրա համար, որ խեղճը արդեն Հայաստանի նախագահ կամ վարչապետ տեսնելիս ուղղակի փախչի: Ըստ երևույթին Հայաստանի իշխանության մոտ դա հմուտ մարտավարություն է. եթե Պուտինին վախացնել չի լինում, ուրեմն պետք է զզվացնել: Իրականում սակայն, Հայաստանի իշխանությունը առիթը բաց չի թողնում Պուտինին շնորհակալ լինելու և փառաբանելու համար, հատկապես հիմա, երբ հայտնի է, որ նա վերադառնում է Ռուսաստանի նախագահի պաշտոնին: Եվ տպավորությունն ընդհանրապես այնպիսին է, որ Հայաստանն այդ վարկը վերցրել է ոչ այնքան տնտեսության ճգնաժամը հաղթահարելու, որքան հենց Պուտինին տարին մի քանի անգամ շնորհակալություն հայտնելու առիթ ունենալու համար:
Բանն այն է, որ Հայաստանի տնտեսությունը կարծես թե այդքան էլ չի զգացել այդ 500 միլիոն դոլարի էֆեկտը: Դրա էֆեկտը գուցե զգացել են մի քանի իշխանական բիզնեսներ, որոնք շռայլորեն վարկավորվել են ռուսական 500 միլիոնից, և մեկ էլ գուցե ռուսական ընկերությունները: Օրինակ, Հայաստանի գազային մոնոպոլիստ Հայռուսգազարդը ռուսական վարկից 40 միլիոն դոլար ստացավ: Տիգրան Սարգսյանը Պուտինի հետ հանդիպմանը հայտարարել է, թե ռուսական ընկերությունները Հայաստանում իրենց լավ են զգում: Դե իհարկե, Հայաստանում իրենց լավ զգում են միայն ռուսական և իշխանական ընկերությունները, իսկ մնացյալ, ովքեր չունեն ռուսական կամ իշխանական տանիք, իրենց վատ, շատ վատ են զգում և նաև պարբերաբար զգում են հարկային «տեռորիստների» շունչը:
Դրա հետևանքով է նաև, որ Հայաստանում շունչը փչում է փոքր ու միջին բիզնեսը և ոլորտը կամաց-կամաց անցնում է կամ ռուսական ծագումով կապիտալին, կամ Հայաստանի իշխանական բիզնեսներին: Իսկ Հայաստանի սուվերենության և քաղաքացիների հանդեպ տարած ռուս-իշխանական համատեղ հաղթանակից հետո կողմերին կմնա փոփոխել Հայաստանի օրհներգի բառերը, ի երախտագիտություն Պուտինի` «այսքան ուրախ կյանքը մեր, ընկեր Պուտինն է տվել»:
