ԱՄՆ բնակիչների կողմից ալկոհոլի չարաշահումը երկրի տնտեսությանը տարեկան հասցնում է ավելի քան 200 մլրդ դոլարի վնաս: Այս մասին ասվում է ԱՄՆ հիվանդությունների նախազգուշացման և վերահսկման կենտրոնի (Centers for Disease Control and Prevention, CDC) տարածած մամուլի հաղորդագրության մեջ:
CDC-ի անցկացրած հետազոտության համաձայն` 2006 թ. ալկոհոլի չարաշահումից երկրի տնտեսությանը հասցվել է 223.5 մլրդ դոլարի վնաս, մինչդեռ 1998 թ. այդ ցուցանիշը ընդամենը 198 մլրդ դոլար էր: Վնասի ավելի քան 70%-ը ալկոհոլից կախվածության պատճառով քաղաքացիների աշխատունակության մակարդակի անկումն է: Տնտեսական կորուստների 11%-ը ալկոհոլի պատճառով մահացու ելքով դժբախտ պատահարների և հանցագործությունների հետևանք է: Այսպիսով՝ յուրաքանչյուր մեկ բաժակ ալկոհոլը ամերիկյան տնտեսությանը արժենում է 2 դոլար:
CDC մասնագետները նշել են, որ կանանց համար ալկոհոլի օգտագործումը չարաշահում է համարվում, երբ այն գերազանցում է օրական մեկ անգամը, տղամարդկանց համար` օրական երկու անգամը:
Մասնագետները եկել են այն եզրակացության, որ ԱՄՆ բնակչության ավելի քան 15%-ն օգտագործում է մեծ քանակությամբ ալկոհոլ: Ամերիկացիները համարվում են աշխարհի ամենաշատ ալկոհոլ օգտագործող ժողովուրդներից մեկը. միջին վիճակագրական ամերիկացին ալկոհոլ է օգտագործում ամեն օր: