Իրանի նախկին նախագահ Մուհամադ Խաթամիի լրատվական կայքի հաղորդմամբ՝ Խաթամին մի շարք համալսարանականների հետ հանդիպման ընթացքում, անդրադառնալով մտքի ու խոսքի ազատության կարևորությանը, հայտարարել է. «Համալսարաններում և մամուլում խոսքի ու մտքի ազատության առկայությունը վերացնում է լճացումն ու կոռուպցիան, իսկ հակառակ դեպքում՝ ազատ մտածողության ընդհատակ անցնելու արդյունքը միայն փլուզումն է»։
Խաթամին, քննադատելով համալսարաններում տիրող սահմանափակումները, հավելել է. «Միտքն ու մտածողությունը սպանել հնարավոր չէ: Հասարակությունից և մասնավորապես համալսարանականներից ազատ մտածելու ու արտահայտվելու իրավունքը խլելու դեպքում դրանք ընդհատակ են անցնելու և հեռանկարում հանգեցնելու են փլուզման»։
Իրանի նախկին նախագահը վերջում հայտարարել է. «Համալսարանները ազատություն իրականացնելու լրջագույն փորձարկման վայրն են»։
