Ավտոմեքենայի օգտագործման պատասխանատվությունից բխող պարտադիր ապահովագրության (ԱՊՊԱ) օրենքը և կիրառումը ցույց տվեցին իրենց կենսունակությունը: Նման տեսակետ «Առաջին լրատվականի» հետ զրույցում հայտնեց ԱԺ ֆինանսավարկային և բյուջետային հարցերի հանձնաժողովի նախագահ Գագիկ Մինասյանը:
«Առաջին տարվա համար բավականին դրական ցուցանիշներ ունենք: Կարողացանք հասնել նրան, որ այլևս չունենք տուժողներ, որ ավտովթարների հետևանքով մնում էին անօգնական: Օրենքի գերխնդիրը տուժողների շահերի պաշտպանությունն էր, և այն բոլոր սկզբունքները, որ ծնել են այս օրենքը աշխարհի տարբեր երկրներում, ըստ էության, արդարացրեցին իրենց նաև մեզանում: Մենք այսօր չունենք մի իրավիճակ, որ անկախ տրանսպորտային միջոցի տիրոջ բարեխղճությունից, անբարեխղճությունից, ֆինանսական կարողությունից, տուժողը չի տուժում և միշտ ստանում է համապատասխան բժշկական օգնություն, կամ, Աստված մի արասցե, եթե մահվան ելք է, նրա հարազատներն են փոխհատուցում ստանում օրենքով սահմանված չափով, եթե ունենք գույքային վնասներ, ապա դրանք են փոխհատուցվում»,- ասաց Գ.Մինասյանը:
Նրա բնորոշմամբ՝ ԱՊՊԱ-ն ունի մի թերություն, որի մասին շատերն են ասում՝ խցանումները, երբ որոշակի ժամանակ է պետք լինում, մինչև կառույցների ներկայացուցիչները գալիս են և արձանագրում: Ըստ Գ.Մինասյանի՝ հարկավոր է ուսումնասիրել և հասկանալ միջազգային փորձը, թե այնտեղ ինչպես է արագ կարգավորվում այդ խնդիրը:
Այն հարցին, թե շատ է խոսվում ԱՊՊԱ-ի գերշահույթների մասին, հնարավո՞ր է ԱՊՊԱ վճարները նվազեցնել, Գ.Մինասյանը պատասխանեց. «Նոր բիզնեսի հետ կապված ծախսերն անհամաչափ են լինում՝ տեխնիկա գնել, համակարգչային ծրագրեր, մարդկանց վերապատրաստել, բայց դրանք շարունակական չեն լինելու: Այս տարվա բեռնվածությունը պետք է որոշակիորեն ավելի բարձր լինի, քան ստանդարտ տարիներինը: Այս գնահատականը հաշվի առնելով՝ ավտոապահովագրողները կհաշվարկեն ավելի հավասարակշռված բազային ապահովագրամիջոց եկող տարիների համար, և այդ մտահոգությունները կվերանան»: Նրա խոսքով՝ առաջին տարվա համար գործնականում հնարավոր չէր վճարը ռեալ հաշվարկել, քանի որ վթարների իրական քանակը 10 անգամ գերազանցեց եղած վիճակագրությունը:
