Այսօր Հայաստանում իր դիվանագիտական առաքելությունն սկսեց ՀՀ-ում ԱՄՆ նորանշանակ դեսպան Ջոն Ա. Հեֆերնը: Նա այս պաշտոնում փոխարինում է հունիսին իր պաշտոնավարման ժամկետն ավարտած Մարի Յովանովիչին:
Հեֆերնը և նրա կինը` Լիլի Հեֆերնը, այսօր հանդիպեցին հայ լրագրողների հետ: Դեսպանը նշեց, որ իրենք առաջին անգամ են Հայաստանում. «Ես ուրախ եմ, որ նախագահ Սարգսյանն ինձ ընդունեց, և ես նրան հանձնեցի իմ հավատարմագրերը, ավելի վաղ հանդիպել էի ՀՀ արտգործնախարարի հետ»:
Հեֆերնը նշեց, որ իրենց նպատակն է խորացնել հայ-ամերիկյան համագործակցությունը երեք ուղղություններով. առաջին` տարածաշրջանային ինտեգրման, երկրորդ`տնտեսական ոլորտում երկկողմ առևտրի և ներդրումների միջոցով երկկողմ կապերի ամրապնդման, երրորդ՝ քաղաքական ոլորտում աշխատանքներ են տարվելու, որպեսզի հայաստանյան առաջիկա համապետական ընտրությունները լինեն լավագույնը և համապատասխանեն միջազգային չափանիշներին:
Դեսպանը նաև տեղեկացրեց, որ այս շաբաթվա ընթացքում ԱՄՆ երկու բարձրաստիճան պաշտոնյա է ժամանելու Հայաստան, մասնավորապես՝ Հայաստան է ժամանելու ԱՄՆ պետքարտուղարի սպառազինությունների գծով տեղակալ Ռոզե Գոթմելերը, իսկ չորեքշաբթի Հայաստան է ժամանելու ԱՄՆ պետքարտուղարի առաջին տեղակալ Վիլյամ Բըրնսը:
ԼՂ հակամարտության վերաբերյալ իր դիրքորոշումն արտահայտելով՝ նորանշանակ դեսպանը նշեց, որ Միացյալ Նահանգները հավատարիմ է խնդրի խաղաղ կարգավորմանը և աշխատում է Մինսկի խմբի շրջանակներում: Ցեղասպանության ճանաչման խնդրին անդրադառնալով, դեսպանը նշեց, որ նախագահ Օբամայի ապրիլ քսանչորսյան հայտարարությունը բավականին հստակ ներկայացնում է այդ հարցում ԱՄՆ դիրքրոշումը և ինքը պաշտպանելու է այդ դիրքորոշումը:
