«Նոր ժամանակներ» կուսակցության նախագահ Արամ Կարապետյանը համոզված է, որ Վիգեն Սարգսյանի` Հայաստանի նախագահի աշխատակազմի ղեկավարի պաշտոնում նշանակումը որոշակի աշխարհաքաղաքական հետևանքներ է ունենալու: Նման վստահություն նա հայտնեց «Առաջին լրատվական»-ի հետ ունեցած զրույցում` միաժամանակ հավելելով, որ ավելին դեռևս չի ուզում ասել:
«Սա քաղաքական գործընթաց չէ, այլ ադմինիստրատիվ: Վիգեն Սարգսյանի նշանակման և քաղաքականության միջև առայժմ կապ չեմ տեսնում, այդ է պատճառը, որ դժվարանում եմ հստակ որակումներ տալ: Պարզապես կասեմ, որ եթե Հայաստանի ԱԱԾ-ն նրա` ԱՄՆ գործակալ լինելու մասին տեղեկություններ ուներ, պետք է ստուգեր դրանք: Դրանով պետք է զբաղվեր նաև Սերժ Սարգսյանը»,- նկատեց Արամ Կարպետյանը` հավելելով, որ դա Սերժ Սարգսյանի անձնական խնդիրն է:
Հիշեցնենք, որ ավելի քան մեկ տարի առաջ մամուլում լուրեր էին տարածվել, որ Վիգեն Սարգսյանը ամերիկյան գործակալ է: Նմանօրինակ բովանդակությամբ անանուն նամակներ ուղարկվել էին հայաստանյան գրեթե բոլոր լրատվամիջոցներին:
ՀՀ ԱԱԾ-ն այդ առնչությամբ հերքում էր տարածել: «ՀՀ ԱԱԾ-ն հայտարարում է, որ տարածված նամակը քաղաքական և լրատվական որոշակի շրջանակների հերթական չհաջողված արկածախնդրության դրսևորումներից է, ինչը բացարձակապես չի համապատասխանում իրականությանը և չի կարող անգամ ճշմարտանման լինել»,- նշված էր հաղորդագրությունում:
Հիշեցնենք նաև, որ նախագահի աշխատակազմի ղեկավարի պաշտոնը թափուր էր մնացել Կարեն Կարապետյանի` այդ պաշտոնից հեռանալուց հետո:
