Ճապոնացիները փորձում են նորաձևության մեջ մտցնել արհեստական դեմք: Վերջերս շուկա դուրս եկած Real-f ընկերությունն առաջարկում է ցանկացողներին պատվիրել իրենց գլխի եռաչափ կրկնօրինակը: Դատելով ընկերության կայքում և նրա ֆեյսբուքյան էջում տեղադրրված նկարներից` կրկնօրինակը միանգամայն նման է ստացվում:
Ինչպես հաղորդվում է The Daily Mail պարբերականը, մեկ «դիմակի» արժեքը 3920 դոլար է: Այդ գումարի դիմաց մասնագետները վերցնում են մարդու դեմքի չափսը և կոշտ վինիլից պատրաստում նրա դեմքի եռաչափ կրկնօրինակը: Ցանկացողները կարող են պատվիրել նաև իրենց գլխի կամ ուսերի վինիլային կրկնօրինակը, որն արդեն կարժենա 5875 դոլար:
Իրենք` գյուտարարները, նոր մոդելն անվանում են 3DPF – 3 Dimensional Photo Form (եռաչափ ֆոտոձև):
Պարբերականը հայտնում է, որ դեմքի կրկնօրինակներ պատրաստվել են նաև նախկինում, սակայն տարբերությունն այն է, որ ճապոնացիների մոտ դա ավելի բնական է ստացվում:
Միակ բանը, որ առայժմ չեն կարողանում բացատրել ճապոնացիները, այն է, թե ինչ նպատակով կարելի է օգտագործել արհեսատական դեմքը: Նրանք համարում են, որ եռաչափ մոդելը ավանդական լուսանկարների զարգացումն է` բացատրելով, թե սկզբում մարդկությունը սև և սպիտակ լուսանկարներից անցում կատարեց գունավորին, իսկ այժմ երկչափ պատկերից անցում է կատարվում եռաչափին:
