News Georgia-ի փոխանցմամբ՝ վրացի միլիարդատեր Բիձինիա Իվանիշվիլիի անձնական փաստաբան Էկա Բեսելիան մտադիր է դատական հայց ներկայացնել Վրաստանի նախագահ Միխեիլ Սաակաշվիլիի դեմ՝ վերջինիս արձակած թիվ 602 հրամանի համար, որով Իվանիշվիլին ու նրա կին Եկատերինա Խվեդելիձեն զրկվել են Վրաստանի քաղաքացիությունից։
Այս մասին հայտարարել է հենց ինքը՝ Բեսելիան, որը նշել է. «Միխեիլ Սաակաշվիլին 2011 թվականի հոկտեմբերի 11-ին ստորագրել է թիվ 602 հրամանը, որով Վրաստանի քաղաքացիությունից զրկել է Բիձինա Իվանիշվիլիին և Եկատերինա Խվեդելիձեին։ Այդ որոշումն ապօրինի է, և այդ քաղաքական ակտով Սաակաշվիլին խոստովանեց, որ չի հարգում ո՛չ Վրաստանի Սահմանադրությունը, ո՛չ էլ միջազգային իրավունքի նորմերը և անթույլատրելի մեթոդներ է գործածում քաղաքական հակառակորդների դեմ պայքարի համար։
Քաղաքացիությունից զրկելու հրամանն ընդունվել է օրենքի կոպիտ ոտնահարմամբ։ Մասնավորապես՝ խախտվել է Վրաստանի քաղաքացիության մասին օրգանական օրենքը, ինչպես նաև վարչական ակտի (քաղաքացիությունից զրկելու մասին) տրման ընթացակարգը, ինչը հանդիսանում է առանձին դատական գործընթացի առարկա։ Ամենաանբարոյականն այն է, որ Սաակաշվիլին Վրաստանի քաղաքացիությունից զրկել է ոչ միայն իր քաղաքական հակառակորդին, այլև նրա կնոջը։
Վերջինս իր ամուսնու նման Վրաստանի քաղաքացիություն է ստացել 2004 թվականի հուլիսի 24-ին, երբ արդեն իսկ հանդիսանում էր Ֆրանսիայի ու Ռուսաստանի քաղաքացի։ Խվեդելիձեն բազմիցս ֆրանսիական անձնագրով հատել է Վրաստանի սահմանը, ինչը հաստատված է համապատասխան մարմինների կողմից»։
Հիշեցնենք, որ 5.5 միլիարդ դոլարի կարողություն ունեցող Իվանիշվիլին Ֆրանսիայի քաղաքացիություն է ստացել 2010 թվականի մայիսին, ինչի համար նրան միայն հիմա են զրկում Վրաստանի քաղաքացիությունից։
Օրեր առաջ Իվանիշվիլին հայտարարել էր, որ Վրաստանում քաղաքականությամբ զբաղվելու համար պետք է հիմնի կուսակցություն ու մասնակցի 2012 թվականին Վրաստանում կայանալիք խորհրդարանական ընտրություններին և հանուն դրա պատրաստ է հրաժարվել Ֆրանսիայի ու Ռուսաստանի քաղաքացիությունից ու վաճառել Ռուսաստանում ունեցած իր բիզնեսը։
