Եգիպտոսի քաղաքական կյանքի կենտրոնում`Կահիրեի «Ալ-Թահրիր» հրապարակում, տեղի է ունեցել քրիստոնյաների և մուսուլմանների համատեղ երթ` կրոնական թշնամանքի և ազգային երկպառակության դեմ:
Երթին մասնակցել է շուրջ 2000 մարդ: Ցուցարարները պահանջել են վերջ դնել միջհամայնքային երկպառակությանը և իրենց բողոքն են արտահայտել անցյալ շաբաթ ղպտիների ցույցի դաժան ճնշումների դեմ:
Ցուցարարները, որոնց մեծ մասը մուսուլմաններ են եղել, բացականչել են. «Ո՛չ միջհամայնքային թշնամանքին, դա զինվորականների դավադրությունն է»: Մյուսները կրել են հոկտեմբերի 9-ին սպանված Մինա Դանիելի նկարով սև շապիկներ և երգել. «Մենք բոլորս Մինա Դանիել ենք», «Մուսուլմաննե՛ր, ասացեք ձեր քրիստոնյա եղբայրներին, որ մենք բոլորս միևնույն նավակում ենք», «Մուսուլմանները և քրիստոնյաները ընթանում են ուս ուսի տված»:
