Այն բանից հետո, երբ Մակարևիչն ավելի ակտիվ սկսեց ներկայացնել «Պուտինը գալիս է մեզ մոտ` Խոլուեվո» երգը, նա դարձավ իշխանամետ ուժերի թիրախ: Երգը մեծ տարածում է գտել համացանցում և լուրջ քննարկումների տեղիք է տվել: Սակայն այս ամենը հարուցում է Մակարևիչի զարմանքը, որն ասում է, թե այդ երգը շատ ավելի վաղ է գրվել և պետք չէ այն կապել Պուտինի` նախագահի պաշտոնում ընտրվելու որոշման հետ: Այս մասին հաղորդում է RIA-Novosti գործակալությունը:
«Գիտե՞ք, ես ինչի վրա եմ ապշում: Այս երգը գրվել է մեկ տարի առաջ և, ընդհանրապես, շատ հաճախ է հնչում համերգների ժամանակ»,- ասել է երգիչը գործակալությանը տված հարցազրույցում: «Երգն ընդհանրապես Պուտինի մասին չէ, այլ այն ստորաքարշ վերաբերմունքի մասին, որ կա մեր իշխանության նկատմամբ շրջաններում»,- հավելել է նա:
Հավելենք, որ Մակարևիչը վերջերս աչքի է ընկնում ՌԴ իշխանությունների քննադատությամբ, ինչը հատկապես կապված է Պուտինի այն որոշման հետ, համաձայն որի նա պատրաստվում է նորից ստանձնել ՌԴ նախագահի պաշտոնը:
