«Պահանջվում է միլիոնատեր» ֆիլմի ստեղծագործական և պրոդյուսերական թիմը կրկին համախմբվել է նոր կինոնախագծի շուրջ:
Արկածային սյուժեով, սուր հումորով լի կատակերգությունը կցուցադրվի հոկտեմբերի 25-ից՝ «Մոսկվա» և «Նաիրի» կինոթատրոններում:
«Փեսացուն կրկեսից» ֆիլմում նկարահանվել են հայտնի դերասաններ Հովհաննես Ազոյանը, Սերժ Ավետիքյանը, Ռոզի Ավետիսովան, Վիվիեն Բաստաջյանը, Սամվել Սարգսյանը, Նարեկ Դուրյանը, Սոս Ջանիբեկյանը և ուրիշներ:
Մասնագիտությամբ անասնաբույժ գլխավոր հերոսը` Նարեկը, որին մարմնավորում է Հովհաննես Ազոյանը, սիրահարված է մի աղջկա, որի հայրը դեսպան է: Հերոսը ժամանում է ամառանոց` ծանոթանալու աղջկա ծնողների հետ` իր հետ բերելով իր սիրելի կապիկ Միկկիին, որին նա փորձում է թաքցնել դեսպանից և դեսպանի կնոջից:
Սակայն իրադարձությունները դուրս են գալիս վերահսկողությունից` ամառանոցում սկսվում է զարգանալ զվարճալի պատմություն՝ դեսպանի, հատուկ ծառայությունների, գլխավոր հերոսի և կապիկ Միկկիի մասնակցությամբ: Այդ զվարճալի և խճճված պատմությունը կարծես թե վատ է ավարտվում բոլորի համար, սակայն կա մի հանգամանք, որը օգնում է ֆիլմի հերոսներին խուսափել անհաջողություններից:
