Այսօր Հայաստանի պատմության թանգարանում բացվեց «Հայաստանը Ք.ա. IV – Ք.ա. III դարերում» խորագրով ցուցահանդեսը` նվիրված Արտաշատ մայրաքաղաքի հիմնադրման 2200-ամյակին: Ցուցահանդեսի բացմանը ներկա էին ՀՀ ԱԺ նախագահ Հովիկ Աբրահամյանը և մշակույթի նախարար Հասմիկ Պողոսյանը: Ըստ Հ. Պողոսյանի` այս ցուցահանդեսը լավագույն առիթն է ամփոփելու պատմությունը: «Կարևոր է, որ այսօր նշում ենք Արտաշատի հիմնադրման 2200 ամյակը»,- նման կարծիք հայտնեց նախարարը:
«Այս ցուցադրությունը բացառիկ մշակութային արժեքներ է մատուցում, որոնք ներկայացված են միայն այս թանգարանում»,- տեղեկացրեց Հայաստանի պատմության թանգարանի Էքսպոզիցիոն բաժնի վարիչ Արմինե Զոհրաբյանը` ընդգծելով, որ մեծ արժեք են ներկայացնում նաև Արտաշեսյան դրամները, որոնք նույնպես ցուցադրված են թանգարանում:
Նշենք, որ հռոմեական պատմագրությունն Արտաշատի տեղի ընտրությունը և հատակագծումը վերագրում է Կարթագենի հռչակավոր զորավար Հաննիբալին: Գտնվելով միջազգային տարանցիկ ճանապարհների խաչմերուկում `կարճ ժամանակ անց Արտաշատը դառնում է Հայաստանի քաղաքական, տնտեսական և մշակութային խոշոր կենտրոն:
