Ադրբեջանական Salam News գործակալության փոխանցմամբ՝ Nabucco գազատարի նախագիծը դուրս է մնում ադրբեջանական «Շահ Դենիզ» գազային հանքավայրի երկորդ փուլի (2017) մշակման արդյունքում ստացվելիք գազի համար պայքարից։
Երեկ էներգետիկայի գծով ԵՄ-ի կոմիսար Գյունթեր Օթթինգերը հայտարարեց, որ Nabucco գազատարի նախագծի արժեքը կարող է կազմել 10-14 միլիարդ եվրո, մինչդեռ սկզբնական շրջանում գնահատվում էր 7.9 միլիարդ եվրո։ Դրանով Nabucco գազատարի նախագիծը կորցրեց ռուսական «Գազպրոմ»-ի գազային նախագծերի (Հյուսիսային ու Հարավային հոսքեր) նկատմամբ ունեցած իր միակ առավելությունը՝ ցածր գինը։
Բացի այդ, այս շաբաթ Nabucco-ի կոնսորցիումի կազմի մեջ մտնող OMV Gas GmbH ընկերության գործադիր տնօրեն Գերհարդ Ռոյսը հայտարարեց, որ «Շահ Դենիզ»-ի գազի առաքումները Nabucco խողովակաշարով կարող են սկսվել ոչ թե 2017 թվականին, ինչպես ավելի վաղ պլանավորված էր, այլ՝ 2018 թվականին։
Սրանով Nabucco-ն գործնականում զրկվեց «Շահ Դենիզ» գազային հանքավայրի երկրորդ փուլի ժամանակ արդյունահանվելիք գազին հավակնելուց, որոնց թվում են նաև ITGI («Թուրքիա-Հունաստան-Իտալիա») և TAP («Տրանսադրիատիկ») նախագծերը, ինչպես նաև British Petroleum-ի վերջերս առաջ քաշած Հարավարևելյան գազատարի նախագիծը։
Հիշեցնենք, որ օրեր առաջ Ադրբեջանի Հանրապետության պետական նավթային ընկերության (SOCAR) նախագահ Ռովնագ Աբդուլաևը հայտարարել էր, որ «Շահ Դենիզ» գազային հանքավայրի գազի՝ դեպի Եվրոպա փոխադրման երթուղին հայտնի կդառնա մինչև տարեվերջ.
«Ներկայումս Ադրբեջանը դիտարկում է միջազգային կոնսորցիումների ներկայացրած առաջարկները, որոնք առնչվում են «Շահ Դենիզ» գազային հանքավայրի գազի փոխադրմանը Եվրոպա։ Այդ առաջարկների գնահատականը կպահանջի 15-20 օր»։
