«ՀԱԿ-ի վերջին հանրահավաքների ժամանակ իշխանության համախոհների` կիլոգրամներով կուսակցական տոմսեր եմ ոչնչացրել»,- այսօր տեղի ունեցած մամուլի ասուլիսի ժամանակ հայտարարեց ՀՀՇ վարչության նախագահ Արամ Մանուկյանը:
«Սա իսկական ճեղք էր: Մենք մեր ասելիքն արեցինք, շուրջօրյա հանրահավաքներն անցան եղբայրական, հումանիստական մթնոլորտում: Մարտի 1-ից հետո երեք տարի անց Հայաստանի քաղաքացին կարողացավ հաղթահարել իր վախը, գիշերացույցեր անել: Հենց դրա արդյունքում մեր կորիզը մեծացավ, ուժեղացավ»,- նկատեց նա:
Նրա խոսքով` ՀԱԿ-ը պարտավոր էր անցնել երկխոսության ճանապարհով` իբրև պայքարի խաղաղ միջոց, և մաքուր է իր խղճի առջև: «Երկխոսության միջոցները սպառված են, սակայն ժողովրդավար պայքարի բազմաթիվ սպեկտրներ կան: Մեր օրակարգում միայն մեկ կարևոր հարց կա` Սերժ Սարգսյանի հրաժարականի հարցը, մեր տակտիկայի մեջ հստակեցումներ են մտել: Ժողովրդի ճնշող մեծամասնությունը տուժում է իշխանության գործողություններից, նա փոփոխությունների կարիք ունի: Եվ չկա այլ քաղաքական ուժ, քան ՀԱԿ-ն է, որը ռեալ ուժ կունենա իշխանափոխություն իրականացնել»,- ասաց Մանուկյանը:
Արամ Մանուկյանը նաև տեղեկացրեց, որ հոկտեմբերի 28-ի ՀԱԿ հանրահավաքի համար կոնկրետ բաղադրատոմսեր դեռևս չունեն: «Ութօրյա մեր ակցիան բեկում էր, որը վախի չեզոքացում և ուժի ամրապնդում արձանագրեց»,- ասաց նա:
Անդրադառնալով ՀԱԿ ակտիվիստ Տիգրան Առաքելյանի անազատության մեջ մնալու փաստին` Արամ Մանուկյանը նկատեց, որ նրան օգնելու համար օգտագործելու է կուսակցական բոլոր եվրոպական կապերը: «Ես Տիգրանի հարցը բարձրացնելու եմ Եվրոպայում, միջազգայնացման փուլ եմ փոխադրելու»,- խոստացավ ՀՀՇ վարչության նախագահը: