Ադրբեջանական Salam News գործակալության փոխանցմամբ՝ Ադրբեջանի վարչապետ Արթուր Ռասիզադեն ընդունել է Բաքվում գտնվող Թուրքիայի պաշտպանության նախարար Իսմեթ Յըլմազին։
Հանդիպման ժամանակ Ռասիզադեն հայտարարել է, որ Թուրքիան Ադրբեջանի համար հարազատ երկիր է. «Թուրքիայի ու Ադրբեջանի միջև հարաբերությունները բարձր մակարդակով զարգանում են բոլոր ոլորտներում, այդ թվում՝ նաև պաշտպանական։ Ադրբեջանի անկախության առաջին տարիներին Թուրքիան մեծ աջակցություն է ցուցաբերել ադրբեջանական բանակի ստեղծման հարցում։ Նմանատիպ այցերը պայմաններ են ստեղծում երկկողմանի հարաբերությունների ամրագրման և հատկապես պաշտպանական ոլորտում հատուկ համագործակցության համար»։
Իսմեթ Յըլմազն իր հերթին գոհունակություն է հայտնել իր ադրբեջանական այցի կապակցությամբ և Ռասիզադեին է փոխանցել իր երկրի նախագահի ու վարչապետի ողջույնները։
Յըլմազը նաև շնորհավորել է Ադրբեջանի անկախության 20-ամյակի կապակցությամբ՝ ընդգծելով, որ Թուրքիան մեծ կարևորություն է տալիս Ադրբեջանի հետ հարաբերություններին։ Յըլմազի կարծիքով՝ երկու երկրների միջև պաշտպանական ոլորտում համագործակցությունը մշտապես զարգանալու և ամրապնդվելու է։
