ԱԺ ՀՀԿ խմբակցության պատգամավոր Համլետ Հարությունյանն այսօր լրագրողների հետ հանդիպման ժամանակ նշեց, որ առաջիկա ընտրություններում Ահարոն Ադիբեկյանի թվերը չեն օգնի: Նա նշեց, որ ինչ հզոր ուժ էլ ուզում է լինի՝ եթե նորմալ աշխատանք չտարավ նախընտրական շրջանում և ճիշտ մարտավարություն չընտրեց, հաջողության չի հասնի: Նրա գնահատմամբ՝ ներկա փուլում լավ աշխատում են ՀՀԿ-ն, ԲՀԿ-ն, ՕԵԿ-ը, «Ժառանգությունը», ՀՅԴ-ն: Հարությունյանը որոշ վերապահումներով նշեց ՀԱԿ-ի անունը. «Մնացածի անունը որ չեմ տալիս, ուրեմն վատ են աշխատում: Ես կարծում եմ, որ առաջիկա տասը տարում Հայաստանում կմնան երկու-երեք կուսակցություն»:
Համլետ Հարությունյանը նաև նկատեց, որ թույլ կուսակցություններն են հանդես գալիս դաշինքով, իսկ հզոր և մեծ կուսակցությունները մենակ են գնում ընտրությունների, ներկայանում են իրենց լիդերով և, որպես կանոն, ավելի մեծ հաջողությունների են հասնում:
ՀԱԿ-ի հնարավորությունների մասին խոսելիս՝ Հարությունյանը նշեց, որ սովորաբար ընդդիմությունը ձնագնդի նման է` գնալով աճում է, սակայն ՀԱԿ-ի միտինգներին հետևելուց ինքը ձնհալի տպավորություն է ստանում:
ՀԱԿ-իշխանություն ընդհատված երկխոսությանն անդրադառնալով՝ Հարությունյանը նշեց. «Ոնց որ էս ժողովրդին ձեռ են առնում` մեկ երկխոսում են, մեկ չեն երկխոսում, մեկ նստում են, մեկ վեր են կենում»:
Նրա խոսքերով՝ ՀԱԿ-ը կարող էր երկխոսությանը զուգընթաց իրականացնել իր ակտիվիստի ազատ արձակման գործընթացը՝ նկատելով, որ այդ պայմաններում ՀԱԿ-ը ճնշման ավելի մեծ լծակ կունենար: