Ամերիկյան զորքերը իններորդ օրն անընդմեջ հարվածներ են հասցնում Իրանին։
ԱՄՆ Կենտրոնական հրամանատարությունն իր հայտարարության մեջ հայտնել է «հարվածների նոր ալիքի» մեկնարկի մասին, որոնք ուղղված են Հորմուզի նեղուցի կենսական նշանակություն ունեցող նավագնացային ուղիներում առևտրային նավերի վրա հարձակվելու՝ Իրանի կարողությունների «նվազեցմանը»: Ավելի մանրամասն տեղեկատվություն չի տրամադրվել:
Իրանական «Թասնիմ» լրատվական գործակալությունը, հղում անելով սեփական թղթակիցներին, հայտնել է, որ երկուշաբթի վաղ առավոտյան ամերիկյան հրթիռները հարվածներ են հասցրել իրանական մի քանի քաղաքների:
Ըստ «Թասնիմ»-ի՝ պայթյուններ են լսվել Թավրիզում, Չաբահարում, Քոնարակում, Բանդար-Մահշահրում և Բանդար-Իմամ-Խոմեյնիում:
ԱՄՆ պետքարտուղար Մարկո Ռուբիոն հայտարարել է, որ Միացյալ Նահանգները կշարունակի հարվածներ հասցնել Իրանին, քանի դեռ նա հարձակվում է համաշխարհային առևտրային նավագնացության վրա:
«Հորմուզի նեղուցը միջազգային ջրային ուղի է, իսկ նրանք շարունակում են հարձակվել այդ միջազգային ջրերում գտնվող նավերի վրա»,- ասել է Ռուբիոն՝ հավելելով,- «Քանի դեռ Իրանը պնդում է միջազգային ջրային ուղու նկատմամբ վերահսկողություն սահմանելու իր դիրքորոշումը, մենք ստիպված կլինենք արձագանքել դրան: Միացյալ Նահանգները միշտ բաց է դիվանագիտական լուծման համար»։
