Հայ կանանց իրազեկվածության մակարդակը տարեցտարի բարձրանում է, և նրանք ժամանակի հետ ավելի ու ավելի լավ են գիտակցում, որ ընտանեկան բռնությունների ենթարկվելիս իրավունք ունեն դիմել համապատասխան կառույցներ: Այսօր կայացած մամուլի ասուլիսի ժամանակ այս մասին հայտարարեց Կանանց իրավունքների կենտրոնի տնօրեն Սուսաննա Վարդանյանը:
Նա, միաժամանակ, տեղեկացրեց, որ 2011 թվականի հունվար-փետրվար ամիսների ընթացքում կենտրոնի թեժ գծին 1348 զանգ է ստացվել, որոնցից 854-ի դեպքում կանայք բողոքել են իրենց հանդեպ հոգեբանական բնույթի բռնություններից, նրանցից 481-ը` ֆիզիկական և միայն 13-ը` սեռական: «Միաժամանակ, ունեցել ենք նաև մեր կենտրոն դիմած, բռնության ենթարկված մեկ հղի կին: Հատկանշական է, որ կենտրոն ամենից շատ դիմում են 26-32, ինչպես նաև մինչև 46 տարեկան կանայք»,- նկատեց Սուսաննա Վարդանյանը:
Նրա խոսքով, բռնության ենթարկված կանայք, հաճախ զերծ մնալով ոստիկանություն կամ դատարան դիմելուց, այդ փաստը բացատրում են հասարակության բացասական արձագանքով, սեփական երեխաներից ամաչելու փաստով և այլն:
Կենտրոնի տնօրենն ափսոսանք հայտնեց, որ Ազգային ժողովի պատգամավորները, այդ թվում` իգական սեռի, միշտ չէ, որ կանանց իրավունքների վերաբերյալ օրինագծեր ընդունելու բավարար շահագրգռվածություն են ցուցաբերում:
Ամփոփելով` Սուսաննա Վարդանյանը նկատեց, որ 2010 թվականի 9 ամիսներին Կանանց իրավունքների կենտրոնի թեժ գիծը ստացել է 1268 զանգ:
