Հայ-թուրքական արձանագրությունների ստորագրման գործընթացը Հայաստանի համար տեղի ունեցավ հանպատրաստից, բայց ժամանակը ցույց տվեց, որ այդ գործընթացը մնաց անպտուղ: Այսօր տեղի ունեցած մամուլի ասուլիսի ժամաակ այս մասին հայտարարեց ԼՂՀ նախկին արտգործնախարար Արման Մելիքյանը:
«Իմ համոզմամբ, այդ գործընթացը հրահրված էր արտաքին ուժերի կողմից: Մեկը ԱՄՆ-ն էր, որն արեց ամեն բան, որպեսզի գործընթացը հանգի շոշափելի արդյունքների: Մյուս կողմից` կար ռուսական կողմը, որ Հարավային Կովկասում ունի շահեր և դեմ է այդ ձևաչափով հայ-թուրքական հարաբերությունների կարգավորմանը»,- նկատեց Արման Մելիքյանը:
Նա միաժամանակ հավելեց, որ գործընթացը մի ներկայացում էր` արված հայաստանաբնակ հայերի, Սփյուռքի և Եվրոպայի համար:
ՀՀԿ պատգամավոր Լեռնիկ Ալեքսանյանն իր հերթին նկատեց, որ հայ-թուրքական հարաբերությունները «սկսել են քայլ անել»: «Իհարկե, կան լուրջ խոչընդոտներ, սակայն երկու հարևան պետությունները պետք է քայլեր անեն: Առաջին քայլն արված է, և անկախ նրանից` արդյունք կա, թե` ոչ, դա դրական քայլ է: Միաժամանակ` չեմ կարծում, որ հայ-թուրքական գործընթացը դրսի ուժերի կողմից հրահրված չէր: Հայաստանի և Թուրքիայի հարաբերությունները պետք է ի վերջո դրվեն դիվանագիտական ռելսերի վրա»,- ասաց Ալեքսանյանը:
Անդրադառնալով Շառլ Ազնավուրի հարցազրույցին` Ալեքսանյանը նկատեց, որ մի քանի անգամ խորին ուշադրությամբ ընթերցել է այն, և մեծ շանսոնյեն լիովին անկեղծ խոսքով է հանդես եկել, որքան էլ դա ցավոտ լինի: «Նա ունի այդ իրավունքը: Մեր քաղաքական դաշտում նման գնահատականներ պետք է շատ լինեն: Սա մտահոգ մարդու անկեղծ խոսք էր, ով քաղաքական շահագրգռվածություններ չունի»,- նկատեց նա` հավելելով, որ շատ անգամ նույնիսկ ինքն է վարանում բարձրաձայն ասել այն, ինչ կցանկնար ասել:
Արման Մելիքյանի գնահատականով` Ազնավուրի հարցազրույցի Ցեղասպանության մասին հատվածն ուղղված էր Սփյուռքին, այն մարդկանց, ովքեր Ցեղասպանությունը դարձրել են սեփական մակաբուծության աղբյուր: «Երկրորդ մասը, որ վերաբերում էր Հայաստանին, նույնչափ էական էր: Ազնավուրի ասածը բարձր եմ գնահատում, քանի որ դա մտահոգ մարդու խոսք էր: Նա կարող է սեղմել իշխանության ձեռքը և միաժամանակ ասել այն, ինչ մտածում է նույն այդ իշխանության մասին»,- ասաց Արման Մելիքյանը:
