Այսօր ծխախոտի դեմ պայքարի ազգային օրն է, և այս կապակցությամբ Հայաստանի ամերիկյան համալսարանի առողջապահական ծառայությունների հետազոտման և զարգացման կենտրոնը, «Պողոսյան պարտեզներ» հիմնադրամի հետ համատեղ, տարրական դասարանի աշակերտների հետ Սիրահարների այգում ծխելու և երկրորդային ծխի թեմայով կազմակերպեց «Բաց դաս»:
Ինչպես «Առաջին լրատվական»-ի հետ զրույցում տեղեկացրեց կազմակերպիչներից մեկը, ակցիային մասնակցում են 3-րդ դասարանի աշակերտներ, ովքեր ներկում են ծխախոտի դեմ պայքարի նշանը համապատասխան գույներով և պատրաստում դրոշակներ: «Այս ակցիան նպատակ ունի մատաղ սերնդին մինչ հասուն կյանք մտնելը զգուշացնել, որ ծխելը վնասակար է առողջությանը, մասնավորապես՝ սրտին: Շատ կարևոր է ակցիայի անցկացումը»,- ասաց կազմակերպիչը` ընդգծելով, որ ակցիան շարունակական է լինելու: Միջոցառմանը ներկա երեխաները նշանները ներկեցին գեղեցիկ գույներով և իրար պատմեցին, թե ծխախոտի ծուխը ինչքան վտանգավոր կարող է լինել մարդու առողջության համար:
Տեղեկացնենք, որ 2009 թվից հոկտեմբերի 12-ը պաշտոնապես նշվում է որպես ծխախոտի դեմ պայքարի ազգային օր: Վերջին տարիներին այս օրվա կապակցությամբ երիտասարդները բազմաթիվ միջոցառումներ են կազմակերպում հասարակությանը ծխախոտ չօգտագործելը հորդորելու համար: