Իրաքը և Պակիստանը հաջողությամբ բանակցել են Իրանի հետ՝ ապահովելու նավթի և հեղուկացված բնական գազի անվտանգ տեղափոխումը ռազմական գործողությունների գոտի դարձած Հորմուզի նեղուցով։
Ինչպես հաղորդում է Reuters լրատվական գործակալությունը, Բաղդադի և Թեհրանի միջև ձեռք բերված պայմանավորվածության շնորհիվ մայիսի 10-ին նեղուցով անարգել անցել են իրաքյան նավթով բեռնված երկու խոշոր տանկերներ, որոնք տեղափոխում էին շուրջ 2 միլիոն բարել հումք։
Նմանատիպ համաձայնություն է ձեռք բերել նաև Իսլամաբադը, ինչի արդյունքում Իրանը թույլատրել է կատարական գազ տեղափոխող երկու տանկերների մուտքը Պակիստան։
Նշվում է, որ պատերազմական գործողությունների պատճառով մարտ ամսից ի վեր Պակիստանը զրկված էր վառելիքի կանոնավոր մատակարարումներից։
Ըստ Reuters-ի աղբյուրների՝ այս գործարքների շրջանակում ո՛չ Իրաքը, ո՛չ Պակիստանը որևէ ուղղակի վճարում չեն կատարել Իրանի պաշտոնական մարմիններին կամ Իսլամական հեղափոխության պահապանների կորպուսին, ինչը թույլ է տվել խուսափել միջազգային պատժամիջոցների խախտումից։
