«Ազգ» օրաթերթի խմբագիր Հակոբ Ավետիքյանը անհամաչափ և անարդար է որակում «Ժամանակ» օրաթերթի հիմնադիր «Սկիզբ Մեդիա Կենտրոն»-ի դատական գործով Վերաքննիչ քաղաքացիական դատարանի կայացրած վճիռը, համաձայն որի՝ Քոչարյանների ընտանիքին նախօրոք որոշված 6 մլն դրամի փոխարեն պետք է 3 մլն դրամի փոխհատուցում վճարվի: Այս մասին Ավետիքյանն ասաց «Առաջին լրատվական»-ի հետ զրույցում:
«Ազգի» խմբագրի խոսքով՝ լրատվամիջոցներից տուգանվող գումարի չափը չպետք է գերազանցի 200-300 հազար դրամը, հակառակ պարագայում լրատվամիջոցի եկամուտների ու բռնագանձվող գումարի անհամաչափությունը Հայաստանում լույս տեսնող թերթերին պարզապես սնանկացումով է սպառնում: «Ես, օրինակ, կնախընտրեի 1-1,5 տարի բանտում նստել, քան թե դատարանի սահմանած գումարի չափը վճարել: Բանտ նստելուս պարագայում գոնե իմ թերթին սնանկացում չէր սպառնա»,- ընդգծեց Ավետիքյանը:
Նրա խոսքով՝ անընդունելի է, որ հայաստանյան «արդար դատարանները», կատարելով հզոր մարդկանց հրահանգները, մամուլին դնեն ծանր վիճակի մեջ և «զրպարտությունների» համար լրատվամիջոցներից հսկայական գումարներ պահանջեն:
Հիշեցնենք, որ Սեդրակ և Բելլա Քոչարյաններն ընդդեմ «Ժամանակ» օրաթերթի հիմնադիր «Սկիզբ Մեդիա Կենտրոն»-ի դատական գործով Վերաքննիչ քաղացիական դատարանն այսօր հրապարակեց դատական ակտը: Ըստ այդմ` դատարանը մերժեց «Սկիզբ Մեդիա Կենտրոն» ընկերության վերաքննիչ բողոքը` ուժի մեջ թողնելով Առաջին ատյանի դատարանի վճիռը:
Նշենք, որ Ռոբերտ Քոչարյանի ընտանիքը դատական հայց էր ներկայացրել «Ժամանակ» օրաթերթի հիմնադիր «Սկիզբ Մեդիա Կենտրոն» ՍՊԸ-ի դեմ` պարբերականին մեղադրելով Քոչարյանների բարի համբավը արատավորելու մեջ: Քոչարյանների ընտանիքը 6 մլն դրամի փոխհատուցում էր պահանջում օրաթերթից՝ 3 մլն-ը դատական ծախսերի համար, իսկ մյուս 3 մլն-ը՝ որպես բարոյական վնասի փոխհատուցում: Երևանի Կենտրոն և Նորք-Մարաշ վարչական շրջանների ընդհանուր իրավասության դատարանը բավարարել է հայցվորների փոխհատուցման պահանջը` որոշելով հօգուտ նրանց 3 միլիոն փոխհատուցել` պահանջված 6-ի փոխարեն:
