Մերձավոր Արևելքում Իրանի հետ պատերազմը, որը մեկնարկել էր փետրվարի 28-ին ԱՄՆ-ի և Իսրայելի կողմից Իրանի վրա հարձակումներով, հազարավոր մարդկանց կյանք է խլել։ Reuters-ը հաղորդում է ապրիլի 8-ի դրությամբ հրապարակված զոհերի թիվը։
Իրան
ԱՄՆ-ում գործող HRANA իրավապաշտպան խումբը հայտնել է, որ պատերազմի սկսվելուց ի վեր Իրանում զոհվել է 3636 մարդ: Կարմիր խաչի և Կարմիր մահիկի միջազգային ֆեդերացիան հայտնել է, որ զոհվել է առնվազն 1900 մարդ։
Լիբանան
Լիբանանի իշխանությունները հայտնել են, որ մարտի 2-ից ի վեր Իսրայելի հարվածների հետևանքով զոհվել է 1530 մարդ, այդ թվում՝ առնվազն 129 երեխա։ Միևնույն ժամանակ, ՄԱԿ-ի երեք ինդոնեզացի խաղաղապահներ զոհվել են Լիբանանի հարավում տեղի ունեցած երկու առանձին միջադեպերի ժամանակ։
Իրաք
Իրաքի առողջապահական մարմինների տվյալներով՝ ճգնաժամի սկզբից ի վեր զոհվել է առնվազն 117 մարդ։
Իսրայել
Իսրայելի շտապօգնության ծառայության տվյալներով՝ Իրանից և Լիբանանից արձակված հրթիռները Իսրայելում 23 մարդու կյանք են խլել։ Իսրայելական բանակը նաև հայտնել է, որ իր 11 զինվորները զոհվել են Լիբանանի հարավում։
ԱՄՆ
ԱՄՆ կենտրոնական հրամանատարությունը հայտնել է, որ հակամարտության ընթացքում 13 զինծառայող զոհվել է, ավելի քան 300-ը՝ վիրավորվել։
Արաբական Միացյալ Էմիրություններ
Զոհվել է 13 մարդ, այդ թվում՝ երկու զինվոր:
Կատար
Յոթ մարդ է զոհվել մարտի 22-ին Կատարի տարածքային ջրերում տեղի ունեցած ուղղաթիռի մահացու վթարի հետևանքով՝ «առօրյա գործողությունների» ընթացքում տեխնիկական անսարքության պատճառով։
Քուվեյթ
Իշխանությունները հայտնել են յոթ զոհի մասին։
Արևմտյան ափ
4 պաղեստինցի կին զոհվել է իրանական հրթիռային հարձակման հետևանքով։
Սիրիա
Իրանական կողմից Սուեյդա քաղաքի շենքին հրթիռային հարվածի հետևանքով չորս մարդ է զոհվել։
Բահրեյն
Իրանի կողմից երկու առանձին հարձակումների հետևանքով երկու մարդ է զոհվել։
Օման
Մարտի 13-ին Սոհար նահանգի արդյունաբերական գոտում անօդաչու թռչող սարքի հարվածի հետևանքով երկու մարդ է զոհվել։
Սաուդյան Արաբիա
Երկու մարդ է զոհվել մայրաքաղաք Էր Ռիադից հարավ-արևելք գտնվող ալ-Խարջ քաղաքի բնակելի թաղամասի վրա արկի ընկնելու հետևանքով։
Ֆրանսիա Հյուսիսային Իրաքում անօդաչու թռչող սարքի հարվածից մեկ ֆրանսիացի զինվոր է զոհվել։
Լուսանկարը` AP-ի
