Իսրայելական Mig News-ի փոխանցմամբ՝ ԵԱՀԿ-ում Նիդերլանդների ներկայացուցիչ և «Ազատություն» կուսակցության անդամ Վիմ Կորտոնեովենը կտրուկ քննադատել է Թուրքիային՝ Կիպրոսի և Իսրայելի նկատմամբ վարած քաղաքականության համար։
Խորվաթիայի Դուբրովնիկ քաղաքում տեղի ունեցած կոնֆերանսի ժամանակ Մերձավոր Արևելքի հարցերով մասնագետ Վիմը նշել է. «Թուրքիան ՆԱՏՕ-ի անդամ է, գնալով նա ավելի ռազմատենչ հայտարարություններ է անում ընդդեմ Իսրայելի։ Թուրքիան գնալով ավելի շատ է սպառնում ու անգիտակցաբար մեղադրում Իսրայելին։ Սադրանքները դառնում են ավելի վտանգավոր։ Թուրքական ռազմանավերը հետապնդում են իսրայելական առևտրանավերին։
Թուրքիան դեմ է հանդես գալիս իր իսկ բացառապես տնտեսական գոտում Իսրայելի կողմից գազային հանքավայրերի մշակման հարցում նրա ունեցած օրինական մտադրության դեմ։ Թուրքական ռազմանավերն աջակցում են իսրայելական ինքնիշխանության դեմ ուղղված այդ սպառնալիքին։ Այդպիսի իրավիճակում մի փոքրիկ սխալը կարող է հանգեցնել զինված հակամարտության։
Այս ամենում մեղավորը Թուրքիայի վարչապետ Էրդողանն է և նրա «Արդարություն և զարգացում» կուսակցությունը (ԱԶԿ)։ Չի կարող անհանգստություն չառաջացնել ՀԱՄԱՍ ահաբեկչական կազմակերպության հանդեպ Թուրքիայի համակրանքը։ Նույնը վերաբերում է Գազայի ծովային երթուղիների վերահսկման վերաբերյալ Իսրայելի օրինական իրավունքի խաթարմանն ուղղված քայլերին։
Այժմ Էրդողանը Թուրքիան վերածել է գիշատիչ երկրի, որը, ամենայն հավանականությամբ, մտադիր է զավթել միջերկրածովյան նավթային և գազային պաշարները, որոնք չեն պատկանում նրան։ Թուրքիան սպառնում է Կիպրոսին՝ հզոր ռազմական խմբավորում տեղակայելով նրա անմիջական մերձակայքում։ Իրավիճակը ծայրահեղ վտանգավոր է։ Պետք է անհապաղ քննարկել թուրքական այդ անպատասխանատու քաղաքականությունը, որը սպառնում է Միջերկրածովյան շրջանի և նրա սահմաններից դուրս խաղաղությանն ու անվտանգությանը։ Ես պահանջում եմ, որ այս հարցը քննարկման դրվի ԵԱՀԿ-ի ձմեռային նստաշրջանում»։