ԵՄ անդամ 27 երկրների արտաքին գործերի նախարարները հոկտեմբերի 10-ին Եվրամիության նիստի ժամանակ իրենց ափսոսանքն են հայտնել այն բանի համար, որ Ռուսաստանը և Չինաստանը վետո դրեցին Սիրիայի նկատմամբ՝ ՄԱԿ-ի Անվտանգության խորհրդի բանաձևին, որով դատապարտվում էին Սիրիայում տեղի ունեցող բռնությունները: Այս մասին հաղորդում է РИА Новости-ն:
ԵՄ մամլո ծառայությունը հաղորդում է, որ ԵՄ-ն կպահանջի Սիրիայի իշխանությունների նկատմամբ միջազգային ճնշումների խստացում` կոչ անելով ՄԱԿ-ի ԱԽ բոլոր անդամներին պատասխանատվությամբ մոտնենալ այդ հարցին:
ԵՄ երկրների ԱԳՆ ղեկավարները կոչ արեցին Սիրիայի նախագահին՝ հեռանալ, և հայտարարեցին, որ մտադիր են Սիրիայի ղեկավարների նկատմամբ կիրառել մի քանի կետերից բաղկացած սանկցիաներ:
Հիշեցնենք, որ Ռուսաստանը և Չինաստանը վետո կիրառեցին ՄԱԿ-ի ԱԽ բանաձևի նկատմամբ: Բանաձում Սիրիայի իշխանություններից պահանջվում էր վերջ դնել ցուցարարների նկատմամբ ուժի կիրառմանը, հակառակ դեպքում՝ սանկցիաներ կկիրառվեին Դամասկոսի դեմ: Բանաձևին կողմ քվեարկեցին 9 երկրներ, 4 երկիր ձեռնպահ մնաց:
