Մայրաքաղաքում հաշվառված սոցիալապես անապահով ընտանիքներից շուրջ 200–ը, որոնք ունեն մանկահասակ երեխաներ՝ անապահով ընտանիքների աջակցության հերթական ակցիայի շրջանակում ստացել են մանուկներին անհրաժեշտ պարագաներ և ծածկոցներ։ «Ակցիան Երևանի քաղաքապետարանի և Հանրապետական կուսակցության համատեղ իրականացրած հերթական միջոցառումներից է։
Ընդ որում հատկանշական է, որ մեր համատեղ միջոցառումները ուղղված են ոչ միայն անապահով ընտանիքների մանկահասակ երեխաների, այլև մայրաքաղաքում բնակավող ծերերի, հաշմանդամների և ընդհանրապես կարիքավոր ընտանիքների օժանդակությանը»,-նշել է Երևանի քաղաքապետարանի սոցիալական վարչության պետ Ռուզաննա Զաքարյանն ավելացնելով, որ նման միջոցառումները և, ընդհանրապես, սոցիալական ծրագրերը Երևանի քաղաքապետի մշտական ուշադրության կենտրոնում են։
Հանրապետական կուսակցության կանանց խորհրդի նախագահ, ԱԺ պատգամավոր Հերմինե Նաղդալյանն իր հերթին կարևորելով նման միջոցառումների անհրաժեշտությունը, ընդգծել է, որ այս համատեքստում առանձնակի կարևոր է հատկապես երիտասարդ ընտանիքներին աջակցությունը. «Երիտասարդ ընտանիքներն են մեր պետության վաղվա օրն ու այն, ինչ արվում է այս ընտանիքների համար, ըստ էության մեր պետության վաղվա օրվա համար է արվում», – նշել է Հերմինե Նաղդալյանը հավելելով, որ խոցելի և անապահով ընտանիքներին ուղղված աջակցության ծրագրերը եղել ու մնում են կուսակցության առաջնահերթությունների թվում։
