Հոկտեմբերի 10-ին, ժ. 17.30-ի դրությամբ Տավուշի մարզի սողանքային գոտում որոնողական աշխատանքներին ներգրավված են ՀՀ ԱԻՆ 186 փրկարարներ՝ Տավուշի, Լոռու, Գեղարքունիքի, Արագածոտնի մարզերից և Երևանից:
Որոնողական աշխատանքներին մասնակցում են նաև Այրումի և Սանահինի կայարանների անձնակազմերից՝ 27 հոգի, Հրազդան ՋԷԿ-ից՝ 15 աշխատակից, Ախթալայի լեռնափրկարարական ջոկատից՝ 5 լեռնափրկարար և 16 ոստիկան:
Ինժեներական տեխնիկայից սողանքի գոտում աշխատում են 1 կռունկ, 1 էքսկավատոր, 1 քարշակ, 3 վագոն և 3 բուլդոզեր, տեղում հերթապահում է 3 բժիշկ և ճանապարհային ոստիկանության 2 մեքենա:
Հիշեցնենք, որ հոկտեմբերի 2-ին, ժամը 19.03-ին M6 միջպետական մայրուղու 83-րդ կիլոմետրին Վանաձոր-Բագրատաշեն հատվածում` Այրում երկաթուղային կայարանի կամրջի մոտ (Լճկաձոր գյուղի հատվածում) տեղի է ունեցել սողանք: Փլուզված հատվածի (ճանապարհի եզրով) երկարությունը մոտ 300 մետր է, որից առավել վտանգավոր է 130 մետրը, իսկ ճանապարհին սահած հողազանգվածի միջին բարձրությունը 10-15 մետր է:
Այսօր առավոտյան փրկարարները 20 մետր խորությամբ հողաշերտի տակ հայտնաբերված խիստ վնասված ավտոմեքենայից դուրս են բերել անհայտ կորածների ցուցակում նշվող երկու անձանց՝ Սորսումատյան եղբայրների դիերը:
