«Թուրքիան երբեք չի վավերացնի հայ-թուրքական արձանագրությունները, միայն կարելի է ակնկալել դիվանագիտական հարաբերությունների հաստատման մասին միջգերատեսչական նոտայի փոխանակում, որը արձանագրությունների վավերացում չի պահանջում»,- այսօր լրագրողների հետ հանդիպման ժամանակ անդրադառնալով հայ-թուրքական արձանագրությունների վավերացման հավանականությանը՝ կարծիք հայտնեց աշխարհաքաղաքական հիմնախնդիրների ակադեմիայի փոխնախագահ Արայիկ Սարգսյանը:
Նա նկատեց, որ արձանագրություններում առկա Ցեղասպանության վերաբերյալ կետը շատ վտանգավոր է Հայաստանի համար, և հավելեց, որ ինքը միանում է այս հարցի վերաբերյալ Շառլ Ազնավուրի և Արամ Առաջին կաթողիկոսի հայտարարություններին. «Կարծում եմ, ոչ միայն սփյուռքի, այլև Հայաստանում ապրող հայերը դեմ են լինելու, եթե նման կետ լինի արձանագրությունների մեջ»:
Այդուամենայնիվ, ըստ Սարգսյանի, հայ-թուրքական արձանագրությունների վավերացումը կախված է ԱՄՆ-ի ցանկությունից, քանզի հենց ԱՄՆ պետդեպարտամենտում են գրվել այդ արձանագրությունները. «Եթե այսօր պետդեպը ստիպի Հայաստանին և Թուրքիային, ապա արձանագրությունները կհաստատվեն»:
