Իրանի խորհրդարանի նախկին պատգամավոր և պահպանողական ազդեցիկ գործիչ Էմադ Աֆրուղը, իրանական Jahan News լրատվական կայքի հետ ունեցած զրույցում, քննադատելով Ահմադինեժադի կառավարությունը, հայտարարել է, որ Իրանի կառավարության մեջ վերևից ներքև բոլորը պատրանքների մեջ են: Ըստ Աֆրուղի՝ կառավարության անդամների պատրանքի գլխավոր պատճառը նախագահի պաշտոնի գլուխ անցնելու ոճն է: Երբ մեկը պետական բոլոր պաշտոնները շատ արագ է անցնում և հասնում է նախագահի պաշտոնին, նրան թվում է, թե ինքն ունի բոլոր նախադրյալները և կարևոր մարդ է: Ներկա կառավարության մեջ բոլորն իրենց տրամաբանությունը անտեսել ու միայն զգացմունքներին են զարկ տալիս:
Էմադ Աֆրուղը նաև հավելել է. «Ես բազմիցս հայտարարել եմ, որ կառավարության կազմ ասածը այսօր գոյություն չունի: Կա մի նախագահ, որի շուրջը միայն կառավարության կազմը շրջում է ու գովաբանում նրան»։
Իրանցի քաղաքական գործիչը, անդրադառնալով ամիսներ առաջ նախագահի խռովությանն ու աշխատանքի չներկայանալուն, նշել է. «Ահմադինեժադը 11 օր խռովեց առաջնորդից ու փակվեց տանը, բայց ոչ ոք փողոցներում չկանչեց «կամ մահ, կամ նախագահ», և դա ապացուցեց, թե Ահմադինեժադը որքան համակիր ունի: Եթե երկրի առաջնորդ Այաթոլլահ Խամենեին չհովանավորեր Ահմադինեժադին ու նրա կառավարությանը, նրանք ոչ մի բան անել էին կարող: Առաջնորդը նպատակահարմարությունից դրդված հովանավորեց նախագահին»։
