Ադրբեջանական Salam News գործակալության փոխանցմամբ՝ ԵԽԽՎ թուրք նախագահ Մևլյութ Չավուշօղլուն լրագրողներին հայտարարել է, որ հայկական կողմը «պետք է» հարգի Լեռնային Ղարաբաղի գծով ստեղծված ենթակոմիտեի աշխատանքները.
«Լեռնային Ղարաբաղի գծով ենթակոմիտեն ստեղծվել է հանուն երկխոսության պահպանման և ԵԽԽՎ-ի մարդու իրավունքների ապահովման։ Դժբախտաբար, հայկական կողմը չի միացել կոմիտեին։ Հայաստանը պետք է նվազագույնը հարգի ԵԽԽՎ-ի որոշումը, սակայն հայերը դա չեն անում։
Մենք ցանկանում ենք նվազագույնի հասցնել Ղարաբաղյան հակամարտությունում մարդու իրավունքների խնդիրը։ Կարևոր է տվյալ ուղղությամբ երկխոսելը։ Եթե խաղաղություն են ցանկանում, ապա պետք է երկխոսել։
Ադրբեջանի «օկուպացված» տարածքներում լուրջ խնդիրներ կան՝ կապված մարդու իրավունքների հետ։ Ներկայումս Ադրբեջանում կան «մոտ 1 միլիոն» փախստականներ ու հարկադիր վերաբնակներ, որոնք իրենց տներից վտարվել են Հայաստանի «զավթողական» քաղաքականության արդյունքում։ Այդ մարդիկ պետք է վերադառնան իրենց հարազատ հողերը»։
Հիշեցնենք, որ այս տարվա հունվարի 28-ին կայացած ԵԽԽՎ բյուրոյի նստաշրջանում ԵԽԽՎ թուրք նախագահ Մևլյութ Չավուշօղլուի հավանությամբ վճռվեց վերականգնել Լեռնային Ղարաբաղի հարցով ԵԽԽՎ ենթակոմիտեն, ինչը հարուցեց հայկական կողմի դժգոհությունը: Իսկ օրեր առաջ Չավուշօղլուն հայտարարեց, որ Ղարաբաղի գծով ենթակոմիտեի գործունեության վերականգնումը տեղի չի ունեցել իր նախաձեռնությամբ։
