Լրագրողների այն հարցին, թե մինչ ընտրությունները կարո՞ղ է այնպիսի իրավիճակ ստեղծվել, որ Սերժ Սարգսյանն ընտրություն կատարի Լևոն Տեր-Պետրոսյանի և Ռոբերտ Քոչարյանի միջև, ՀՀԿ-ական պատգամավոր Մկրտիչ Մինասյանը պատասխանեց. «Ընտրություններից հետո, եթե որևէ քաղաքական ուժ որոշակի տեղ ունենա, ոչինչ չի բացառվում, բայց չգիտեմ, լինելո՞ւ է դա այդպես, թե՝ ոչ: Համագործակցություն ես պատկերացնում եմ ԱԺ ընտրություններից հետո: Սակայն մեր թեկնածուն միանշանակ լինելու է Սերժ Սարգսյանը, և մենք ամեն ինչ անելու ենք, որ հասարակությունը մեր թեկնածուին առավելագույն ձայներ տա»:
Մկրտիչ Մինասյանը կարևորեց Ֆրանսիայի նախագահի այցը Հայաստան, և չհամաձայնեց այն վարկածի հետ, որ այդ օրերին իշխանությունները թույլ տվեցին ընդդինության շուրջօրյա հանրահավաքները` նպատակ ունենալով ցույց տալ ժողովրդավարական գործընթացների նկատմամբ իրենց հանդուրժողականությունը:
Անդրադառնալով Կոնգրեսի` շուրջօրյա բողոքի ակցիաներին` Մինասյանը նշեց. «Հայաստանը ժողովրդավարական երկիր է, ոստիկանությունն էլ զգոն էր, և ամեն ինչ նորմալ անցավ»: Իսկ հարցին, թե ինչու՞ ՀԱԿ-ի բողոքի ակցիային չմիացան այն ուժերը, որոնք վճռականության կոչեր էին անում ընդդիմությանը, ՀՀԿ-ական պատգամավորը չցանկացավ մեկնաբնություններ անել, նկատելով, որ դա այդ ուժերի որոշելիքն է:
Իսկ ինչու՞ էին շրջաններից դեպի Երևան ճանապարհները փակ՝ հարցրեցին լրագրողները: «Ես կարդացել եմ Ալիկ Սարգսյանի հայտարարությունը դրա առնչությամբ, և կարծում եմ, որ նա ամենաիրազեկվածն է այդ հարցում: Ես դուրս չեմ եկել Երևանից, նման դեպքի չեմ հանդիպել»,- նշեց ՀՀԿ-ական պատգամավորը` նկատելով, որ բացառում է Ալիկ Սարգսյանը ստի, թե ինքը նման հրաման չի տվել:
