Քաղաքագետ-վերլուծաբան Երվանդ Բոզոյանը և ՀՀ դիվանագիտական կորպուսի նախկին անդամ, նախկին դեսպան Արման Նավասարդյանն այսօր հանդիպեցին լրագրողների հետ:
Երվանդ Բոզոյանը նկատեց, որ Սարկոզիի այցը տարածաշրջան ավելի շուտ հետախուզական բնույթ էր կրում. «Սարկոզիի համար շատ կարևոր էր, որ գալիք նախագահական ընտրություններում ֆրանսահայերի ձայնը իր համար որոշիչ դառնար: Նա որոշակի հուզմունքային ձևակերպումներ տվեց Ղարաբաղի և Ցեղասպանության վերաբերյալ, և սրանք թեև դիվանագիտական, բայց նաև ներքին օգտագործման արտահայտություններ էին»:
Սարկոզիի հայտարարություններին Թուրքիայի արձագանքի մասին էլ խոսելով՝ Բոզոյանը նկատեց, որ Թուրքիան հասկացել է, որ Սարկոզիի խոսքերը նախընտրական բնույթ ունեին, և կպատասխանի դիվանագիտական ճանապարհով:
ԼՂ հարցում Ֆրանսիայի ակտիվացման մասին խոսակցություններին անդրադառնալով՝ Բոզոյանը նկատեց, որ այս հարցում Սարկոզին զգույշ է, և, օրինակ ունենալով Ռուսաստանի և ԱՄՆ-ի տապալումը, չի ցանկանում երրորդ անգամ նույն ճանապարհը կրկնել: Եվ այս ակտիվությունը պայմանավորված է նաև Լիբիայում Ֆրանսիայի ունեցած ակտիվությամբ: Այժմ էլ վերջինս ցանկանում է ակտիվություն դրսևորել Հարավային Կովկասի տարածաշրջանում, ինչպես նաև՝ Սիրիայում:
Արման Նավասարդյանն էլ նկատեց, որ արտաքին քաղաքականության առումով՝ Սարկոզիի այցը Հայաստանի համար շատ կարևոր է, քանզի Ֆրանսիան աշխարհաքաղաքական նշանակություն ունեցող գերտերություն է: Ըստ բանախոսի՝ Ֆրանսիայի համար ևս այս այցը շատ կարևոր էր, քանզի սրանով ուղի է բացվում դեպի Արևելք:
Նավասարդյանը նկատեց, որ որևէ երկիր չի կարող վերցնել իր վրա ԼՂ հարցի կարգավորումը և հասնել դրական լուծման, նույնը վերաբերում է նաև Ֆրանսիային: Նա նաև հավելեց, որ այդ լուծումը Կրեմլում է:
Հարցին, թե Մինսկի խմբի համանախագահող երկրներում, նախընտրական շրջանով պայմանավորված, հնարավո՞ր է արդյոք ԼՂ հարցի կարգավրումը երկրորդ պլան մղվի, երկու բանախոսներն էլ նկատեցին, որ դա որևէ կերպ չի կարող ազդել բանակցային գործընթացի վրա, իսկ Բոզոյանն էլ հավելեց. «Սովորաբար բանակցությունները երկրորդ պլան մղվում են, երբ նախընտրական շրջան լինում է Հայաստանում և Ադրբեջանում»:
