ՀՀՇ վարչության նախագահ Արամ Մանուկյանն իր այսօրվա ելույթում ներկայացրեց մի շարք միջազգային կազմակերպությունների վերջին տարիներին արձանագրած ցուցանիշները` Հայաստանի վերաբերյալ:
Նա նշեց, որ տարեցտարի բոլոր ցուցանիշներով Հայաստանը զիջում է: Նա տեղեկացրեց, որ ապրելու համար լավագույն պայմաններ ունեցող երկրների ցուցակում Հայաստանը 2006 թ. 68-րդն է եղել, 4 տարվա ընթացքում դարձել է 110-րդը` իջնելով 45 աստիճանով:
Տնտեսական առաջընթացի կամ հետընթացի ցուցանիշով 101 երկրի մեջ Հայաստանը 99-րդ տեղում է:
Ժողովրդավարության ցուցանիշով 1999 թ. հետո ամեն տարի կորուստ է ունեցել:
Գյուղատնտեսության բնագավառում՝ մշակվող հողերի 42-60 տոկոսն այսօր չի մշակվում, գյուղացիական տնտեսությունները 10 տարվա ընթացքում 10 անգամ նվազել են:
Հայաստանից արտագաղթածների ¾-ը գյուղացիներն են:
Արդյունաբերության ոլորտում 90-ականներին աշխատել է 160 հազար մարդ, այսօր` 80 հազար:
30 հազար անհատ ձեռներեց դադարեցրել է իր գործունեությունը, Հայաստանից նրանք գնում են Վրաստան. «Հայաստանի արտաքին պարտքը 4,5 մլրդ-ն անցնում է, 5 անգամ ավել ներմուծում ենք, 5 անգամ պակաս արտահանում, դա նշանակում է, որ Հայաստանում արտադրություն, ռեֆորմ, տնտեսական զարգացում գոյություն չունի»:
Մանուկյանը նաև տեղեկացրեց, որ 2008 թ. աղքատության ցուցանիշը 23 տոկոս էր, իսկ այսօր` 31:
Արտագաղթի ցուցանիշները ներկայացնելով՝ Մանուկյանը նշեց, որ Բելգիայում, Ֆրանսիայում, Կանադայում հայերի ներգաղթը 5 անգամ ավելացել է՝ վերջին 5 տարվա ընթացքում, վերջին 9-ը տարվա ընթացքում 300 հազար հայ Ռուսաստանի քաղաքացիություն է ստացել:
Հայաստանում ծնելիությունն 95-ի համեմատ՝ 2 անգամ նվազել է, ինչն, ըստ Մանուկյանի, կործանվող երկրի ցուցանիշ է:
Տնտեսական աճի տեմպերով, Մանուկյանի խոսքերով՝ ամբողջ աշխարհում` 194 երկրի մեջ Հայաստանը նախավերջին տեղում է: Իսկ մեկ շնչին ընկնող տրանսֆերտների թվով աշխարհում երրորդն է. «Դրա հաշվին է, որ այս ժողովուրդը սովից չի կործանվում, բայց այդ գումարի 30 տոկոսը կառավարվող չենջերով էլի մտնում է սրանց գրպանը, մի երեք օր փակեք՝ կպայթի էս երկիրը: Ավելին`ամեն շնչի հաշվով 499 դոլար տարեկան դուրս է գնում Հայաստանից»:
Ըստ Մանուկյանի՝ Հայաստանը ռեկորդակիր է բոլոր վատ ցուցանիշներով. «Այս ամենը մեր իշխանության քյալագյոզության պատճառով: Կարկանդակի և մտրակի քաղաքականություն է: Մենք ունենք ամենացածր նվազագույն աշխատավարձը եվրոպական երկրներում, տարածաշրջանում` ամենացածր թոշակը, պատերազմի ժամանակ նման թվեր չեն եղել, սրանք էս երկրի դուշմանն են»:
Արամ Մանուկյանը հավելեց, որ անկասկած է, որ այս վիճակից ազատվելու համար պետք է ազատվել այս իշխանություններից:
