Քաղաքագետ Ստեփան Գրիգորյանը կարծում է, որ իշխանությունների արձագանքից է կախված` կշարունակվե՞ն այսուհետ ևս Հայ ազգային կոնգրեսի շուրջօրյա հանրահավաքները, թե՞ ոչ: Այս մասին նա ասաց «Առաջին լրատվական»-ի հետ զրույցում` միաժամանակ չբացառելով, դրանք կարող են շարունակվել անգամ ընդհատված երկխոսության վերսկսման պարագայում:
«ՀԱԿ-ը բողոքի նման ուղի է ընտրել, և դա նորմալ է: Միաժամանակ իշխանության հետագա վերաբերմունքից է կախված` կկարողանա՞ շարունակել իր ընտրած ուղին ընդդիմությունը»,- շեշտեց քաղաքագետը:
Անդրադառնալով իշխանություն – ՀԱԿ երկխոսության հնարավոր վերսկսման թեմային` Ստեփան Գրիգորյանը նկատեց, որ, իր դիտարկումներով, այն, ամենայն հավանականությամբ, կշարունակվի: «Երկրի առջև լուրջ մարտահրավերներ են ծառացած, ակնհայտ է, որ ղարաբաղյան համակարտության, հայ-թուրքական հարաբերությունների կարգավորման խնդիրները, ինչպես նաև արտագաղթը Հայաստանին դրել են բարդ իրավիճակի մեջ: Այս պարագայում իշխանության և ընդդիմության երկխոսությունն ուղղակի անհրաժեշտություն է: Ամեն ինչից դատելով` կողմերի միջև հարաբերությունները չեն սրվի, որովհետև իշխանությունը ևս գիտակցում է երկխոսության կարևորությունը»,- նկատեց փորձագետը:
Ամփոփելով` նա հավելեց, որ ակնհայտ է` այսօրվա խորհրդարանի հետ հեռու գնալ հնարավոր չէ, և, ուզած թե չուզած, Հայաստանին նոր խորհրդարան է անհրաժեշտ: «Ակնհայտ է նաև, որ պետք է թուլացնել տնտեսության վրա մենաշնորհների ազդեցությունը»:
