Լիբիայի Ազգային անցումային խորհրդի զորքերը ուժեղ գրոհ են սկսել երկրի նախկին առաջնորդ Մուամար Քադաֆիի հայրենի Սիրթ քաղաքի վրա։ Ինչպես հաղորդում է BBC-ն, սա վերջին շրջանում ապստամբների ամենամեծ գրոհն է:
Արևելքից և արևմուտքից քաղաքին է մոտեցել զրահատեխնիկա, տանկերը կրակում են քաղաքի ուղղությամբ: Մի շարք շենքեր վառվում են, քաղաքը պատված է ծխի ամպով: BBC-ի թղթակիցը նշում է, որ այս գրոհը կարող է վճռական լինել Մուամար Քադաֆիի կողմնակիցների համար:
Չնայած քաղաքից մարդկանց մեծ արտահոսքին` այնտեղ դեռ շարունակում են մնալ խաղաղ բնակիչներ: Ավելի վաղ ապստամբները հայտարարել էին, որ Սիրթի վերջնական գրոհը կսկսեն միայն այն ժամանակ, երբ քաղաքից դուրս կգա խաղաղ բնակչությունը:
Սիրթը և Բենի Վալիդը Քադաֆիի կողմնակիցների դիմադրության միակ օջախներն են:
