Ֆրանսիայի պաշտպանության նախարար Ժերար Լոնգեն հայտարարել է, որ ՆԱՏՕ-ն չի դադարեցնի Լիբիայի առաքելությունը, քանի դեռ նախկին առաջնորդ Մուամար Քադաֆիի կողմնակիցները շարունակում են դիմադրությունը:
Ինչպես հաղորդում է Reuters գործակալությունը, ՆԱՏՕ-ի անդամ երկրների պաշտպանության նախարարների հանդիպմանը Լոնգեն հայտարարել է, որ իրենց գործողությունները կշարունակվեն այնքան ժամանակ, մինչև դիմադրության բոլոր օջախները ոչնչացվեն, և Ազգային անցումային խորհուրդը խնդրի իրենց դուրս գալ:
«Թատերաբեմից Քադաֆիի հեռանալը կարևոր է, բայց դա բավարար չէ: Ազգային անցումային խորհուրդը ցանկանում է բռնել նրան, և դա կարելի է հասկանալ»,- ասել է Լոնգեն:
Նրա խոսքերով` այն, որ ապստամբները վերահսկողություն են սահմանել Քադաֆիի հայրենի Սիրթ քաղաքի վրա, խորհրդանշական քայլ է, սակայն «դա ամբողջ Լիբիան չէ: Քադաֆիի կողմնակիցները շարունակում են դիմադրություն ցույց տալ Բենի-Վալիդում» և երկրի հարավային այլ քաղաքներում:
Հիշեցնենք՝ երեկ ՆԱՏՕ-ի գլխավոր քարտուղար Անդերս Ֆոգ Ռասմուսենն ասել էր, որ ՆԱՏՕ-ի գործողությունների ավարտը Լիբիայում կախված չէ Քադաֆիի գտնվելու վայրից:
Ավելի վաղ ՆԱՏՕ-ում խոսում էին այն մասին, որ մոտ ժամանակներս Լիբիայում Դաշինքի գործողությունները պետք է ավարտվեն:
