Քրիստոնեա-դեմոկրատական կուսակցության նախագահ, Հանրային խորհրդի անդամ Խոսրով Հարությունյանն այսօր լրագրողների հետ հանդիպման ժամանակ նշեց, որ այժմ երկրում նախընտրական շրջան է, իսկ ՀԱԿ-ի ներկայիս գործողությունները հենց նպատակ ունեն այդ շրջանում առանձնանալ քաղաքական դաշտում առկա մյուս ընդդիմադիրներից: Հարությունյանը նկատեց, որ ի տարբերություն ՀԱԿ-ի` խորհրդարանական ընդդիմությունը դեռևս չի ակտիվացել, քանի որ ունի այլ ռեսուրսներ` խորհրդարանական ամբիոն, և աշխատում է խնամքով օգտագործել իր արսենալը:
Նա նշեց, որ քաղաքական դաշտում դեռևս ուժերը մեկը մեկին շոշափելու փուլում են գտնվում: Հարությունյանը չբացառեց, որ հնարավոր է առաջիկայում նոր վերադասավորումներ լինեն և նոր դաշինքներ ձևավորվեն: Նա ասաց, որ զուտ գաղափարական հենքի վրա ձևավորված դաշինք չի լինի, այլ կլինեն ընդհանուր քաղաքական կոնյունկտուրայից ելնելով, և որպես նման դաշինքի օրինակ բերեց ՀԱԿ-ին` նշելով, որ այնտեղ հավաքված են ծայրահեղ աջերից մինչև ծայրահեղ ձախեր. «Կարող է մի պահ հնչակները, ռամկավարներն ու դաշնակները հավաքվեն մեկ խմբում: Կարծում եմ` քաղաքական դաշտը խոշորացնելու առումով քայլեր կլինեն, իսկ կհաջողի, թե ոչ` մի քիչ հոռետեսորեն եմ վերաբերվում»:
Անդրադառնալով ՉԻ-ի հրապարակմանը այն մասին, թե ինքը ցանկանում է դառնալ ՀՀԿ անդամ և հանդիպումներ է ունեցել Սերժ Սարգսյանի հետ, Հարությունյանը նշեց, որ գաղտնիք չէ, որ ինքը և իր կուսաակցությունը համագործակցում են ՀՀԿ-ի հետ: Նա նշեց, որ գաղտնիք չէ նաև, որ իր կուսակցությունն աջակցել է Սերժ Սարգսյանի թեկնածությունը և առաջիկայում էլ կերևա իրենց դիրքրոշումը, քանզի, ըստ բանախոսի, ՀՀԿ-ն էլ դեռ չի կողմնորոշվել ընտրությունների հարցում իր մարտավարության մեջ, չի կողմնորեշվել կոալիցիայի հետ միասնական հանդես գալու հարցում. «Մենք համագործակցում ենք ՀՀԿ-ի հետ, բայց միասնական հանդես գալու վերաբերյալ կոնկրետ հարց դեռևս չի քննարկվել»:
Հարությունյանը նշեց, որ իր կուսակցությունում դեռևս չի քննարկվել, թե իրենք ինչպես են մասնակցելու առաջիկա խորհրդարանական ընտրություններին, սակայն ակնհայտ է, որ իր կուսակցության նման փոքր կուսակցությունները միայնակ չեն կարող մասնակցել դրանց:
Ըստ Հարությունյանի` առաջիկա խորհրդարանում հայտնվելու հնարավորություն ունեն կոալիցիոն ուժերը, ՀԱԿ-ը, ՀՅԴ-ն, «Ժառանգությունը»: Նա չբացառեց, որ առաջիկա խորհրդարանում մանդատ կունենա նաև նորաստեղծ «Ազատ դեմոկրատներ» կուսակցությունը:
