Грузия Online-ի փոխանցմամբ՝ Վրաստանի նախագահ Միխեիլ Սաակաշվիլին երեկ Ուսուցչի տան բացման արարողության ժամանակ հայտարարել է, որ 2015 թվականին Վրաստանը պետք է լինի արդիականացված երկիր.
«Վրաստանը կլինի այնպիսի երկիր, ուր գործազրկության մակարդակը շատ ցածր կլինի, իսկ կրթական մակարդակը կլինի այնպիսին, ինչպիսին որ առաջատար զարգացած երկրներում է։ Վրաստանը կլինի հեռանկարային երկիր մարդկային բոլոր սերունդների համար, Վրաստանը կունենա ժամանակակից ենթակառույցներ, ժամանակակից արդյունաբերություն։
Լավ կրթահամակակարգը և կրթված հասարակությունը պայմանավորում են արդիականացումը։ Որոշ շրջաններում ժամանակակից դպրոցների շուրջ տիրում է «անասելի աղքատություն»։ Եթե երեխան ապրում է բարաքում, և եթե այդ երեխային անվճար հատկացնում ես համակարգիչ ու գրքեր, ապա նա կարող է ստանալ ամենաժամանակակից կրթություն և շատ շուտով դուրս գալ այդ աղքատությունից՝ այնտեղից դուրս բերելով նաև իր ընտանիքը»։
Հիշեցնենք, որ այս տարվա գարնանն էլ Սաակաշվիլին հայտարարել էր, թե 2013 թվականին Վրաստանում անհնար կլինի տեսնել դպրոց, որ անբարեկարգ վիճակում կգտնվի. «Ավելին, 2013 թվականից սկսած` մեր դպրոցները կլինեն ավելի լավ վիճակում, քան Ամստերդամում և Կոպենհագենում գործող դպրոցները»:
