ՅՈւՆԵՍԿՕ-ի գործադիր կոմիտեն կողմ է արտահայտվել, որպեսզի Պաղեստինի Ինքնավարությունը ստանա կազմակերպության լիիրավ անդամի կարգավիճակ: Քվեարկության ժամանակ պաղեստինցիների օգտին կողմ է քվեարկել 40 մասնակից-երկիր, չորս երկրի ներկայացուցիչներ դեմ են արտահայտվել, տասնչորսը` ձեռնպահ: Այս մասին հայտնում է MIGnews.com կայքը:
Վերջնական որոշումը կկայացնի ՅՈւՆԵՍԿՕ-ի գլխավոր ղեկավար մարմինը` Գերագույն համաժողովը, որը կբացվի Փարիզում՝ սույն թվականի հոկտեմբերի 25-ին: Քվեարկությանը կմասնակցեն կազմակերպության 193 անդամ-պետություններ: Ի դեպ, ՅՈւՆԵՍԿՕ-ի կազմում որևէ երկիր ընդգրկելու համար անհրաժեշտ է մասնակիցների երկու երրորդի աջակցությունը:
ՄԻնչ այժմ պաղեստինցիները ՅՈւՆԵՍԿՕ-ում ունեին դիտորդի կարգավիճակ: Նրանց լիարժեք անդամ դարձնելու կոչ են արել արաբական երկրները, որոնք էլ «առաջ են տարել» քվեարկության գործընթացը:
Պետք է նշել նաև, որ ՅՈւՆԵՍԿՕ-ի կազմում Պաղեստինի ընդունմանը դեմ է արտահայտվել Ֆրանսիան: