«Համաժողովրդական քաղաքացիական ֆորումի» շրջանակներում, որն ունի մի շարք ենթախմբեր, այսօր Ազատության հրապարակում քննարկում կազմակերպվեց` «Քաղաքացիական ֆորումի ռազմավարությունը» թեմայի շրջանակներում, որին մասնակցեց «Սարդարապատ» շարժման համակարգող Ժիրայր Սեֆիլյանը և «Ղարաբաղ» կոմիտեի անդամ Աշոտ Մանուչարյանը:
Ժ.Սեֆիլյանը նախ հիշեցրեց, որ չէր պատկերացնում, որ մի օր Ալիկ Արզումանյանի հետ ընկերություն աներ, որը սկսվեց բանտից, և որ Նիկոլ Փաշինյանի հետ մի խրամատում կարող ենք լինել: «Մենք պիտի փորձեինք ժողովրդավարական սկզբունքների հիման վրա կոլեկտիվ ղեկավար մարմին ձևավորել, դժբախտաբար այդպես չգնաց և մինչև այսօր այդպես չէ: Բայց ամեն ինչ կորած չէ, դեռ ուղղել հնարավոր է: Մենք պետք է արդար լինենք և ասենք, որ նախագահականից նախագահական ժողովուրդն ակտիվանում է և վերջին նախագահական ընտրություններով ակտիվությունը աննախադեպ է` համախմբվածության առումով»,- նշեց Սեֆիլյանը:
Իսկ ինչպե՞ս պետք է այսօր վարվել՝ հարցին Սեֆիլյանը պատասխանեց. «Այսօր համախմբում իրականացնելու համար պետք է լինի փոխանցում հին սերունդից նոր սերունդ, այսինքն` հին սերունդը պետք է բացառապես աջակցի: Այսօրվա բեմահարթակով հնարավոր չէ մոբիլիզացնել հայությանը: Սակայն լուծումներ կան` բեմահարթակի մաքրում-ազնվացում, այլևս քիչ է միայն սահմանադրական կարգի հաստատման պահանջը, որովհետև երեք-չորս տարի առաջ մենք համաձայնում էինք միայն այդ գաղափարով համախմբվել, սակայն ժամանակները անցնում են, մենք ժամանակ չունենք, ժամանակը ի վնաս մեզ է գործում, և այսօր որևէ փոփոխություն եթե պետք է կատարվի` պետք է ի սկզբանե «հանուն»-ի մեջ որակական փոփոխությունը տրված լինի: Իմ համոզումն է, որ մեզ հնարավոր չէ բուժել այդ հոռի երևույթները, ստիպված մենք պետք է երրորդին հրաժեշտ տանք և անցնենք չորրորդին»,- ասաց Սեֆիլյանը` նկատի ունենալով որպես որակական փոփոխություն` երրորդ հանրապետությունից չորրորդ հանրապետություն անցում պրոցեսը:
Նիկոլ Փաշինյանը իր ելույթում հակադարձեց Ժ.Սեֆիլյանի գնահատականներին. «Չկա այնպիսի բան, որ մենք չենք կարող անել: Այսօր հանրապետությունում կա ավազակապետություն, և կա ոչ ավազակապետություն, խնդիրը հետևյալն է` անկախ նրանից, թե մենք ինչպիսին ենք պատկերացնում պետականության հիմքերը, իմ խնդիրը հետևյալն է` մեզանից յուրաքանչյուրը պետք է ընտրություն կատարի, ինքը ավազակապետության գծից այն կողմ է, թե ոչ ավազակապետության գծի կողմն է: Այսօրվա իրավիճակում չեզոքություն հնարավոր չի, որովհետև ցանկացած չեզոքություն անուղղակի քվեարկություն է` հօգուտ ավազակապետության: Եթե որևէ մեկը դժգոհ է ավազակապետությունից, բայց չի գալիս ավազակապետությանը ասում` հեռացիր, ինքը անուղղակի քվեարկում է այդ ավազակապետության օգտին»-, նշեց Ն.Փաշինյանը:
«Եթե Ժիրայր Սեֆիլյանը իմ թշնամու` ավազակապետության թշնամին է, ուրեմն Ժիրայր Սեֆիլյանը իմ բարեկամն է, եթե ես Ժիրայր Սեֆիլյանի թշնամու` ավազակապետության թշնամին եմ, ուրեմն ես Ժ.Սեֆիլյանի բարեկամն եմ: Եթե մենք այս տրամաբանությամբ չպետք է առաջնորդվենք, ես խնդիր եմ տեսնում: Խոսում եք հարթակի մասին, ես այսօր այդ հարթակի վրա եմ, ինչո՞ւ, որովհետև այդ հարթակում ինձ բոլորը դո՞ւր են գալիս, որովհետև այդ հարթակում բոլորը իմ արյունակից եղբա՞յրս են… Ոչ, որովհետև ոչ թե եկել եմ այս մարդկանց կողքն եմ կանգնել, այլ ես եկել եմ խրամատում եմ կանգնել, ես խրամատի մեջ եմ, և կարևորը այն է, որ խրամատից կրակում են նույն ուղղությամբ: Ես խրամատում եմ, ոչ թե մեկի հետ եմ, ինչ-որ մեկի հետևորդն եմ, ինչ-որ մեկի աղանդի հետևորդն եմ, ինչ-որ մեկի ստրուկն եմ, ինչ-որ մեկի հիպնոսի տակ եմ: Այսինքն` ես տեղում եմ, դա առաջին շարքն է: Հիմա` կարողանո՞ւմ ենք մենք հավաքվել հրապարակում և այս իշխանությանը ասենք` քեզ հեռացնում ենք»,- նշեց Ն.Փաշինյանը:
Ապա Ն.Փաշինյանը նշեց. «Ես ունեմ իմ թեկնածուն, ում օգտին քվեարկելու եմ արտահերթ ընտրությունների ժամանակ: Դա չի նշանակում, որ այստեղ կանգնած բոլոր մարդիկ պետք է քվեարկեն իմ թեկնածուի օգտին: Ամբողջ համակարգը, եթե ենթադրենք մի քար ունենք, այդ քարը փշրելու համար դա նույնն է, որ ասենք, որ մի հարվածով դա պետք է ավազ դարձնենք, չի լինում նման բան: Ժիրայր, այդ հարթակը անձինք չեն, այդ հարթակը պայքարի խրամատ է, առաջին գիծ է, այդ հարթակը փակ չի… Էդ ո՞վ է եկել ուզեցել կանգնի այդ հարթակում, մենք փայտն առել ընկել ենք հետևից…»:
Ժ.Սեֆիլյանը կես կատակ-կես լուրջ ասաց, թե Լևոն Զուրաբյանը հիշում է՝ ինչպես հրաժարվեցին խոսք տալ «Սարդարապատ» շարժմանը:
Ն.Փաշինյանը շարունակեց. «Քանի դեռ գոյություն ունի ավազակապետությունը` կարող է գոյություն ունենալ մի գաղափար` ավազակապետությունից Հայաստանը ազատելը… Ժիրայր, ես քնում եմ Ազատության հրապարակում, արի դու էլ քնի, իրար կողքի վրան դնենք, ես ելույթ չեմ ունենա, դու ելույթ կունենաս: Բայց խնդիրը մեկն է` այս խնդրի շուրջ մենք համախմբվո՞ւմ ենք, թե՞ ոչ: Արտահերթ ընտրություններ լինեն` ուզում եք մասնակցեք, չեք ուզում մի մասնակցեք, որ թեկնածուին ուզում եք ընտրեք: Բայց ես չեմ հասկանում, որ երբ կա երկու ճամբարի կռիվ, երբ որ մի ինչ-որ տեղից մեր խրամատին ընկնում են ականներ, ես դա չեմ հասկանում: Երբ որ Սերժի խրամատից են ընկնում, ես դա հասկանում եմ, բայց երբ որ ձեր կողմից են ընկնում ականներ մեր խրամատին` ես դա չեմ հասկանում»,- եզրափակեց Ն.Փաշիյանը:
Քննարկման ավարտին Ժ.Սեֆիլյանը խոստացավ, որը վաղը կգա Ազատության հրապարակ` մասնակցելու հանրահավաքին:
