ՀՀ տրանսպորտի և կապի նախարար Մանուկ Վարդանյանի մոտ այսօր տեղի է ունեցել խորհրդակցություն`ՀՀ Տավուշի մարզպետի, ՀՀ քաղաքաշինության, արտակարգ իրավիճակների, պաշտպանության նախարարությունների, ՀՀ գիտությունների ազգային ակադեմիայի Երկրաբանության ինստիտուտի, նախագծող և շինարարական կազմակերպությունների, նախարարության համապատասխան կառույցների ներկայացուցիչների մասնակցությամբ:
Քննարկվել են հոկտեմբերի 2-ին Վանաձոր-Ալավերդի-Վրաստանի սահման Մ-6 միջպետական մայրուղու 82-րդ կիլոմետրում տեղի ունեցած փլուզման ներկա իրավիճակի, հետևանքների վերացման ընթացքի և վնասված ճանապարհահատվածի հետագա ճակատագրի որոշման հետ կապված հարցեր:
Նախարար Մ.Վարդանյանը նշել է առաջադրված խնդիրների հերթականության հստակ սահմանման կարևորությունը` դրանք ոչ միայն արագորեն, այլև հիմնավոր ու որակով լուծելու համար: Ըստ այդմ` որպես առաջնահերթ խնդիր առանձնացվել է փլվածքի հատվածի երկրաբանական ուսումնասիրությունը, որի հիման վրա հնարավոր կլինի որոշակի պատկերացում կազմել իրականացվելիք հետագա քայլերի, մասնավորապես՝ ներկա ճանապարհի վերականգնման կամ շրջանցող նոր ճանապարհի կառուցման վերաբերյալ:
Խորհրդակցության արդյունքում, երկրաբանական ուսումնասիրություններ իրականացնելու նպատակով, որոշվել է ստեղծել աշխատանքային խումբ` ՀՀ գիտությունների ազգային ակադեմիայի, քաղաքաշինության, արտակարգ իրավիճակների նախարարությունների, նախագծող կազմակերպությունների, «Հայաստանի ավտոմոբիլային ճանապարհների տնօրինություն» ՊՈԱԿ-ի ներկայացուցիչների մասնակցությամբ:
Աշխատանքային խումբն իր ուսումնասիրությունների արդյունքների հիման վրա արված մասնագիտական եզրակացությունը նախարարություն կներկայացնի եռօրյա ժամկետում:
Հանձնարարվել է նաև` հաշվի առնելով նշված ճանապարհահատվածում տրանսպորտային երթևեկության ինտենսիվությունը, մինչև օրվա վերջ առաջարկություններ ներկայացնել երթուղիների կարգավորման վերաբերյալ:
