Օգոստոսի 17-ին Երկրի կողքով կանցնի 2025 PM անվանումը ստացած աստերոիդը, որի տրամագիծը մոտ 50 մետր է։ Աստերոիդը Երկրին կմոտենա մոտավորապես Լուսնի ուղեծրի մեկ տրամագծի հեռավորությամբ. ТАСС-ի փոխանցմամբ՝ այս մասին հայտնել են Ռուսաստանի գիտությունների ակադեմիայի տիեզերական հետազոտությունների ինստիտուտի արեգակնային աստղագիտության լաբորատորիայից։
«2025 PM-ը վերջին ժամանակաշրջանի ամենամոտեցող խոշոր աստերոիդներից մեկն է։ Այդ իսկ պատճառով այն ընդգրկվել է պոտենցիալ վտանգավոր աստերոիդների ցանկում»,- ասված է հաղորդագրությունում։
Աստերոիդը հայտնաբերվել է այս տարվա օգոստոսի 1-ին։ Արեգակի շուրջ նրա պտտվելու ողջ ցիկլը տևում է մոտ 2 տարի։
2025 PM-ը Երկրին ամենամոտը կգտնվի օգոստոսի 17-ին՝ Երևանի ժամանակով 13:03-ին։ Չնայած այն կմտնի մեր մոլորակի գրավիտացիոն ազդեցության գոտի, մասնագետները վստահեցնում են, որ երկրային գրավիտացիոն դաշտի կողմից դրա ձգումը շատ անհավանական է, եթե չլինի անկանխատեսելի բախում որևէ այլ տիեզերական մարմնի հետ։
Մասնագետները շարունակաբար հետևում են 2025 PM-ի ընթացքին և հավաստիացնում, որ այս փուլում որևէ ուղղակի սպառնալիք մոլորակի համար չկա։
