ՀԱԿ-ի հետ երկխոսող կոալիցիոն աշխատանքային խմբի անդամները երեկ քննարկումից հետ որոշել են, որ պատրաստ են շարունակել երկխոսությունը ՀԱԿ-ի հետ, եթե վերջինս դադարեցնի Ազատության հրապարակում անցկացվող շուրջօրյա հանրահավաքները:
ԱԺ ՀՀԿ խմբակցության ղեկավար Գալուստ Սահակյանը, անդրադառնալով այդ հարցին, ասաց. «Նախ ես շատ դեմ եմ, որ մեր աշխատանքային խումբը նման ցերեմոնիկ կերպով գնաց հասավ այդ որոշմանը»:
Սահակյանը նշեց, որ լրագրողները կարող էին հարցնել իրեն և ինքն անմիջապես կպատասխաներ, որ երկխոսությունն անընդհատական պրոցես է, ոչ թե պարտադրական պրոցես` այսօր ուզում ես, վաղը` ոչ. «Եթե դու նոր ֆորմատ ես սկսել և փորձում ես քաղաքական քո ծրագիրն իրագործել, ինչպես նաև ուզում ես նորից նստել կառավարության տանն ու երկխոսել, ապա դա իմաստազուրկ է, դա չի կարող լինել: Եթե պիտի այսպես խաբկանքներով առաջ գնաս, երբ դիմացինդ` ՀԱԿ-ը, պարտվում է ու որոշում հրաժարվել երկխոսությունից, հետո էլ մտածում է՝ ժողովուրդ հավաքեմ, ուժեղ լինեմ ու էլի գնամ նոր թափով երկխոսության, ապա մենք խաղալիք չենք»:
Գալուստ Սահակյանը նշեց, որ, ըստ էության, այսօր էլ երկխոսությունը շարունակվում է, բայց ոչ կառավարության տանը: Նա նաև նշեց, որ կառավարության ընդունելությունների տանն անցկացվող երկխոսության ձևի մեջ ինքը բովանդակություն չի տեսել, այդուամենայնիվ, ըստ նրա՝ լավ կլինի, որ շարունակվի, բայց պետք է կողմերը հավասար դաշտում լինեն:
«Երբ ձեր մի գործողությունն ավարտին կհասցնեք, խնդիրներ կունենաք՝ խնդրեմ, եկեք երկխոսության»,- մեկնաբանելով կոալիցիոն աշխատանքային խմբի որոշումը և դիմելով ՀԱԿ-ին՝ հավելեց Գալուստ Սահակյանը:
