Եգիպտոսում բանակի հասցեին մեղադրանքներ հնչեցրած և դրա համար ձերբակալված բլոգերը գտնվում է ծանր վիճակում:
Ինչպես հաղորդում է Reuters գործակալությունը, բլոգեր Մայքել Նաբիլը տառապում է անեմիայով և երիկամների լուրջ խնդիրներ ունի, որի պատճառով նրա կյանքը վտանգի տակ է: Բացի այդ, օգոստոսի 23-ից նա հացադուլ է հայտարարել և միայն ջուր է խմում:
Որոշ տեղեկություններով` օգոստոսի 30-ին նա հրաժարվել է նաև ջրից, որից հետո նրան տեղափոխել են հիվանդանոց: Այնուհետև Նաբիլը համաձայնել է ջուր խմել, սակայն նրա վիճակը շարունակում է մնալ ծարահեղ ծանր:
Մարտին Եգիպտոսի ռազմական տրիբունալը Նաբիլին դատապարտել է 3 տարվա ազատազրկման Եգիպտոսի զինված ուժերի մասին կեղծ տեղեկություններ տարածելու մեղադրանքով: Facebook սոցիալական կայքում նա գրել էր, որ եգիպտական զորքերը փորձել են դաժանորեն ճնշել Մուբարաքի դեմ ուղղված ցուցարարների բողոքի ակցիաները: Առաջիկայում դատարանը պատրաստվում է վերանայել նրա բողոքը:
«Այդ բողոքը իշխանությունների վերջին հնարավորությունն է ապացուցելու, որ իրենք հարգում են մարդու իրավունքները, արդարադատությունը և ժողովրդավարությունը: Դատարանը պետք է ընդունի, որ նա ուղղակիորեն դատապարտվել է իր հայացքների համար»,- հայտարարել է «Լրագրողներ առանց սահմանների» իրավապաշտպան կազմակերպությունը:
Իրավապաշտպանները սեպտեմբերի վերջին Եգիպտոսի գլխավոր դատախազից տեսակցություն էին խնդրել 25-ամա բլոգերի հետ, սակայն մինչ այժմ պատասխան չեն ստացել: