Ադրբեջանական APA լրատվական գործակալության փոխանցմամբ՝ քաղաքական և ռազմական վերլուծությունների ինստիտուտի փոխտնօրեն, ռուս քաղաքագետ Սերգեյ Մարկեդոնովը երեկ ելույթ է ունեցել Woodrow Wilson կենտրոնում՝ անդրադառնալով Հարավային Կովկասի խնդիրներին.
«Հարավային Կովկասը սովորական տարածաշրջանից վերածվել է եվրոպական, եվրասիական և անդրատլանտյան անվտանգության գլխավոր կետի։ Չնայած Ղարաբաղյան հակամարտության կարգավորման գործընթացում առաջընթացի ակնհայտ բացակայությանը՝ տվյալ խնդրի շուրջ բանակցային գործընթացը հիրավի կարելի է որակել որպես դրական։
Հայաստանի ու Թուրքիայի հարաբերությունների կարգավորումը արդեն անցյալի ու ապագայի խնդիր է։ Հարավային Կովկասի աշխարհաքաղաքական հեռանկարները շատ դեպքերում կախված են Ղարաբաղյան հակամարտության բանակցային գործընթացի և հայ-թուրքական հարաբերությունների կարգավորման զարգացումից։
Այս խնդիրների լուծումը կողմերին հնարավորություն կընձեռի մի կողմ դնել անցյալի խնդիրները և կանխել նոր ճգնաժամերի ու ռիսկերի առաջացումը։
Ինչ վերաբերում է կովկասյան տարածաշրջանում Ռուսաստանի՝ հատուկ դերակատարություն ունենալու ցանկությանը, ապա Մոսկվան, մեկ պլանով գործելու փոխարեն, պետք է, իրավիճակի վրա հենվելով (որքանով որ թույլատրում են պայմանները), պահպանի գոյություն ունեցող ստատուս-քվոն և փոխի այն՝ այլընտրանքի բացակայության դեպքում»։
