Ադրբեջանական Trend լրատվական գործակալությանը տված հարցազրույցի ժամանակ Ադրբեջանի արտգործնախարար Էլմար Մամեդյարովն անդրադարձել է Ղարաբաղյան հակամարտության կարգավորմանը.
«Բանակցային գործընթացում ակտիվության անկումը հիմնականում պայմանավորված է ամառային արձակուրդներով։ ՄԱԿ ԳԱ-ի նստաշրջանին մասնակցելու նպատակով իմ նյույորքյան այցի ժամանակ ես հանդիպում ունեցա ԵԱՀԿ Մինսկի խմբի ռուս և ամերիկացի համանախագահների և ԵԱՀԿ գործող նախագահի հատուկ ներկայացուցիչ Անջեյ Կասպրշիկի հետ։
Մենք հասկանում ենք, որ շատ բան արված է, ընդհանուր առմամբ, ուրվագծերը հստակեցված են, այժմ պետք է աշխատել դետալների վրա։ Մյուս կողմից էլ՝ Ադրբեջանի դիրքորոշումը հայտնի է. քանի որ դեռ չի հաջողվում համաձայնության գալ «հիմնարար սկզբունքների» շուրջ, մենք առաջարկում ենք աշխատանքներ սկսել խաղաղության մեծ համաձայնագրի ուղղությամբ։
Մենք հասկանում ենք, որ Ղարաբաղյան հակամարտությունը շատ բարդ և նուրբ հարց է, ինչպես նաև՝ շատ էմոցիոնալ։ Համանախագահների աշխատանքը շատ բարդ է, բայց երբ միջնորդների դերում հանդես են գալիս ՄԱԿ ԱԽ-ի 3 մշտական անդամներ՝ ԱՄՆ-ն, Ռուսաստանը, Ֆրանսիան, ապա չպետք է ակնկալել դրանից ավելի լավ բանակցային ձևաչափ։
Այլ բան է հակամարտության կարգավորման մոտեցումների հարցը։ Դրանցից մեկի համաձայն՝ կողմերն իրենք են համաձայնում այն առաջարկների հետ, որոնք ներկայացվում են նրանց։ Երկրորդ տարբերակը խաղաղության հարկադրելն է, այսինքն՝ հակամարտության վերջնական կարգավորման վերաբերյալ քաղաքական որոշման ընդունման միջոցով հասնել զինված հակամարտության հետևանքների վերացմանը։ Բայց, ինչպես կարելի է նկատել, այս երկու դեպքում էլ գործընթացը պետք է իրականացվի փուլերով, ինչին և մենք, ի վերջո, գնում ենք։
Հուսով եմ, որ համանախագահները կշարունակեն ջանքեր գործադրել հակամարտության խաղաղ կարգավորման ուղղությամբ։ Պետք է հաշվի առնել, որ այնպիսի փոքր տարածքում, ինչպիսին Հարավային Կովկասն է, բախվում են շատ երկրների շահեր։ Ամեն անգամ ի հայտ են գալիս նոր գործոններ, օրինակ՝ գազային պայմանագրերի գործոնը, որոնք մի կողմից՝ նպաստում են հակամարտության կարգավորմանը, իսկ մյուս կողմից՝ կարող են խոչընդոտներ ստեղծել։
Ես կարծում եմ, որ դիվանագիտությունը պետք է մեծ դեր խաղա այս գործում։ Ռազմական գործողությունները հարուցում են վիթխարի խնդիրներ. թե՛ տնտեսական, թե՛ սոցիալական, թե՛ քաղաքական և անգամ էմոցիոնալ»։
